माजी राष्ट्रपती डॉ. ए.पी.जे. अब्दुल कलाम यांना आज शोकाकुल वातावरणात, शासकीय इतमामात अखेरचा निरोप देण्यात आला. तिन्ही दलांच्या जवानांनी ‘मिसाइल मॅन’ला मानवंदना दिली.
तामिळनाडूतील रामनाथपुरम जिल्ह्यात असलेल्या रामेश्वरम या जन्मस्थळी कलाम यांच्यावर अंत्यसंस्कार करण्यात आले. यावेळी पंतप्रधान नरेंद्र मोदी, संरक्षण मंत्री मनोहर पर्रीकर, काँग्रेस उपाध्यक्ष राहुल गांधी, केंद्रीय मंत्री व्यंकय्या नायडू, आंध्र प्रदेशचे मुख्यमंत्री चंद्राबाबू नायडू आदि मान्यवर उपस्थित होते. प्रकृती अस्वास्थ्यामुळे तामिळनाडूच्या मुख्यमंत्री जयललिता अंत्यसंस्कारांना हजर राहू शकल्या नाहीत.
सामान्यांचे राष्ट्रपती अशी ओळख असलेल्या लाडक्या कलाम यांना अखेरचा निरोप देण्यासाठी रामेश्वरममध्ये जणू शोकसागरच उसळला होता. अंत्यसंस्कार ज्या ठिकाणी झाले तो संपूर्ण परिसर गर्दीने व्यापला होता. ‘कलामसाहब अमर रहे’ अशा घोषणांनी आसमंत दुमदुमलं होतं. पंतप्रधान मोदी यांनी तिरंग्यात लपेटलेल्या कलाम यांच्या पार्थिवाला पुष्पांजली वाहिली. त्यानंतर तिन्ही दलांनी सलामी दिली आणि दुपारी सव्वा बाराच्या सुमारास कलाम यांचा दफनविधी पार पाडण्यात आला.
मोदी यांनी केले कुटुंबीयांचे सांत्वन
पंतप्रधान मोदी यांनी कलाम यांच्या कुटुंबीयांचे सांत्वन केले. कलाम यांचे ज्येष्ठ बंधू मोहम्मद मुथू मीरा लेब्बई माराईकर यांची आस्थेवाईकपणे विचारपूस करत मोदींनी त्यांना धीर दिला.