मुंबईत २०० AC लोकल चालवण्याच्या घोषणा केल्या जात असतानाच सोमवारी नालासोपारा स्थानकात पश्चिम रेल्वेवरील एसी लोकलमध्ये विरुद्ध दिशेकडील दरवाजे उघडला गेला. दुपारी १.३१ च्या सुमारास प्लॅटफॉर्म क्रमांक दोन येथे दरवाजा उघडणे अपेक्षित असताना नेमका दुसऱ्या बाजूने दरवाजा उघडल्याने प्रवाशांची लोकल चुकली. त्यामुळे एसी लोकलच्या देखभालीसह अन्य तांत्रिक दुरुस्तीकडेही लक्ष देण्याची मागणी केली जात आहे.
विरारहून सुटलेली एसी लोकल दुपारी १.३१ च्या सुमारास नालासोपारा स्थानकात थांबली. तिथे या एसी लोकलचे दरवाजे नेमक्या विरुद्ध दिशेने उघडल्याने प्लॅटफॉर्मवर उभे असलेल्या प्रवाशांची पंचाईत झाली. तांत्रिक बिघाडाने या स्थानकात एसी लोकलच्या प्रतीक्षेतील प्रवाशांची ही लोकल चुकली. त्याबद्दल प्रवाशांनी स्टेशनमास्तरांकडे तक्रार नोंदवली आहे.
पश्चिम रेल्वेवर गतवर्षी डिसेंबरमध्ये एकुलती एक एसी लोकल सुरू झाली. जादा तिकीट दरांमुळे प्रवाशांनी पाठ फिरवलेल्या एसी लोकलमध्ये यापूर्वीही काही वेळा तांत्रिक बिघाड उद्भवले आहेत. पावसाळ्यात डब्यात पाण्याची गळती, गाडीतील एसी बंद पडण्यासारख्या तक्रारींमुळे प्रवाशांना त्रास झाला. आठवड्यातून पाच दिवस चालणारी ही एसी लोकल शनिवार, रविवारी देखभाल, दुरुस्तीसाठी चालवण्यात येत नाही. या दोन दिवसांत एसी लोकलच्या देखभाल, दुरुस्तीकडे लक्ष दिले जाते. असे असतानाही आठवड्याच्या पहिल्याच दिवशी या लोकलचा दरवाजा उलट दिशेने उघडल्याने प्रवाशांनी नाराजी व्यक्त केली आहे.