आईने मोबाइल सोबत नेल्याने १४ वर्षीय मुलाने गळफास घेऊन आत्महत्या केली. ही घटना सोमवारी रात्री महालमधील मुंशी गल्ली भागात उघडकीस आली. क्रिष सुनील लुनावत,असे मृतकाचे नाव आहे. तो सातव्या वर्गात शिकत होता.
पोलिसांनी दिलेल्या माहितीनुसार, क्रिष हा आई व बहिणीसोबत राहात होता. दोघीही खासगी काम करतात. त्याला मोबाइलवर खेळण्याचे व्यसन लागले होते. सोमवारी त्याची आई मुंबई येथे गेली. सोबत मोबाइल घेऊन गेली. बहीण कामावर गेली. आईने मोबाइल नेल्याचा विपरित परिणाम त्याच्या मनावर झाला. सायंकाळी त्याने चादरीने गळफास घेऊन आत्महत्या केली. रात्री ९ वाजताच्या सुमारास त्याची बहीण आयशा घरी आली. क्रिषला आवाज दिला. प्रतिसाद मिळाला नाही. खिडकीतून बघितले असता क्रिष गळफास लावलेला दिसला. तिने हंबरडा फोडला. शेजारी जमले. घटनेची माहिती कोतवाली पोलिसांना देण्यात आली. माहिती मिळताच वरिष्ठ पोलिस निरीक्षक उमेश बेसरकर यांच्या मार्गदर्शनाखाली उपनिरीक्षक पी.आर.फुलझेले सहकाऱ्यांसह तेथे पोहोचले. पंचनामा केला.याप्रकरणी कोतवाली पोलिसांनी आकस्मिक मृत्यूची नोंद करून तपास सुरू केला आहे.