मातृत्त्व ही स्त्रीसाठी सन्मानाची बाब असते. मात्र नियती निष्ठूर असेल तर काही जणीच्या नशिबात हे सुखही येत नाही. असाच काहीसा हृदयद्रावक प्रकार अलिकडेच घडला. लग्नानंतर पाच वर्षांनी माता झालेल्या महिलेवर हा प्रसंग ओढवला. निसर्गाने मातृत्वाचे दान दिल्यानंतरही दबा धरून बसलेल्या काळाने घात केल्याने ही महिला अनंताच्या प्रवासाला निघून गेली.
निकिता अमित तिडके असे मृत प्रसूत महिलेचे नाव आहे. प्रसूतीनंतर दोन महिने रुग्णालयातील उपचारानंतर मातेचा मृत्यू झाल्याने अनेक प्रश्नांचे वादळ घोंघावत आहे. याच मुद्यावरून संतापलेल्या नातलगांनी पोलिसांत तक्रार दाखल करीत दाद मागितली आहे. इंडियन मेडिकल असोसिएशनच्या नागपूर शाखेकडे याची तक्रार करण्यात आली आहे.
निकिता तिडके यांना नातेवाईकांनी प्रसूतीसाठी गांधीबागेतील अरिहंत रुग्णालयात दाखल केले. डॉ. विनय रोडे यांनी सिझर करून प्रसूती केली. भरती असताना रक्ताच्या तपासणी वा शस्त्रक्रियेअगोदरच्या चाचण्या झाल्या नसल्याचे नातेवाईकांचे म्हणणे होते. यामुळेच निकिताची प्रकृती ढासळत गेली. चाचणीत टीएलसीचे (टोटल ल्युकोसाईट काऊंट) व एससीचे (सिरम क्रिएटीन) प्रमाण सामान्य होते. त्यानंतर संतुलन बिघडले. किडनी आणि यकृतामध्ये संसर्ग झाला. यासंदर्भात आम्हाला कुठलीही माहिती न देता दोन दिवसांत रुग्णालयातून सुटी होईल, असे सांगण्यात आले. मात्र दोनच दिवसांत निकिताची प्रकृती बिघडली. शस्त्रक्रियेनंतर लावलेल्या टाक्यांमुळे संसर्ग झाला होता. यातच माता दगावली.
आयसीयूचा अभाव
अरिहंत रुग्णालयात अतिदक्षता विभाग (आयसीयू) नाही. यामुळे दुसऱ्या रुग्णालयात उपचारांसाठी पाठविण्यात येत होते. रुग्णालय प्रशासनाने तपासणी करण्याची तसदी न घेतल्याने दुसऱ्या रुग्णालयात चाचण्या झाल्या. निकिताच्या फुफ्फुसांत पाणी भरल्याचे सांगण्यात आले. किडनी व लिव्हरवर सूज होती. मात्र अखेर निकिता यांचा मृत्यू झाला. डॉक्टरांनी हलगर्जी दाखविल्याने निकीता दगावल्या. आम्हाला कुठलेही पैसे किंवा नुकसानभरपाई नको. मात्र भविष्यात असे कुणासोबत होऊ नये अशी भावना अमित तिडके यांनी व्यक्त केली.
या बाबत रुग्णालय प्रशासनाची बाजू जाणून घेतली असता डॉ. रोडे म्हणाले, अरिहंत रुग्णालयात भरती असताना रुग्णाची तब्येत चांगली होती. दुसऱ्या रुग्णालयात हलविले. हलगर्जीचा प्रश्नच उद्भवत नाही. वेळोवेळी कुटुंबाला रुग्णाच्या प्रकृतीची माहिती दिली जात होती, असेही त्यांनी स्पष्ट केले.