राज्यातील अंगणवाडी सेविका अंगणवाडी मदतनीस आणि मिनी अंगणवाडी सेविकांना प्रत्येकी दोन हजार रुपयांची भाऊबीज भेट देण्याचा निर्णय ग्रामविकास, महिला व बाल विकास मंत्री पंकजा मुंडे यांनी मंगळवारी घेतला आहे. ही भाऊबीज भेट राज्यातील २ लाख ७ हजार ९६१ अंगणवाडी सेविकांना मिळणार असून, त्यांच्या बँक खात्यात ही भेट जमा होणार आहे.
राज्यात एकात्मिक बालविकास सेवा योजनेतंर्गत कार्यरत असणाऱ्या ९७ हजार ४७५ अंगणवाडी सेविका, ९७ हजार ४७५ अंगणवाडी मदतनीस व १३ हजार ११ मिनी अंगणवाडी सेविका अशा एकूण २ लाख ०७ हजार ९६१ मानधनी कर्मचाऱ्यांना २०१८-१९ या वित्तीय वर्षासाठी प्रत्येकी रुपये दोन हजार प्रमाणे ‘बहीण बीज’ (भाऊबीज) भेट रक्कम अदा करण्याची बाब शासनाच्या विचाराधीन होती. त्याबाबत पंकजा मुंडे यांनी मंगळवारी याबाबतचा अध्यादेश काढून अंगणवाडी सेविकांना दिवाळी भेट देण्याच्या निर्णयाला मान्यता दिली आहे, असे त्यांच्या कार्यालयातून सांगण्यात आले. गेल्या वर्षीही त्यांनी दोन हजार रुपये ‘बहीण बीज’ अंगणवाडी सेविकांना दिली होती.