स्कूलबसमधून येताना भांडण करणाऱ्या एका विद्यार्थ्याला शिक्षिकेने शाळेत बेदम मारले. यामध्ये अंतर्गत रक्तस्त्राव झाल्याने विद्यार्थ्यावर खासगी हॉस्पिटलमध्ये अतिदक्षता विभागात उपचार सुरू आहेत. या प्रकरणी शिक्षिकेवर अदखलपात्र गुन्ह्याची नोंद करण्यात आली आहे. निगडी येथील सेंट उर्सुला शाळेत सोमवारी (२२ ऑक्टोबर) हा सर्व प्रकार घडला.
नंदिनी सुनीत असे या प्रकरणी गुन्हा दाखल करण्यात आलेल्या शिक्षिकेचे नाव आहे, तर विश्वास दामोदर कांबळे (रा. देहूरोड) यांनी या प्रकरणी निगडी पोलिस ठाण्यात फिर्याद दिली आहे. त्यांचा मुलगा हर्षल (१३, रा. देहूरोड) याला मारहाण करण्यात आली. तो सेंट उर्सुला शाळेत आठवी इयत्तेत शिकतो. त्याच्यावर सध्या निगडी येथील हॉस्पिटलमध्ये उपचार सुरू आहेत. पोलिसांनी दिलेल्या माहितीनुसार, देहूरोडवरून सोमवारी स्कूलबसमधून शाळेत येत असताना त्याचे मित्रासोबत भांडण झाले. शाळेत गेल्यानंतर स्कूलबसमध्ये झालेल्या भांडणावरून शाळेतील शिक्षिकेने हर्षलला बेदम मारहाण केली. यामध्ये हर्षलला अंतर्गत रक्तस्त्राव झाला. अंगावर वळ उठले. शाळा सुटल्यावर सायंकाळी घरी गेल्यावर हर्षलच्या पालकांना हा प्रकार समजला. पालकांनी त्याला उपचारांसाठी तत्काळ निगडीमधील एका रुग्णालयात दाखल केले. त्याची प्रकृती खालावल्याने डॉक्टरांनी त्याला अतिदक्षता विभागात दाखल केले. या सर्व प्रकारानंतर पोलिस आणि पालकांनी शाळेतील सीसीटीव्ही फुटेज तपासले. त्यानंतर या प्रकरणी अदखलपात्र गुन्हा दाखल करण्यात आला. निगडी पोलिस अधिक तपास करीत आहेत.