उत्तर प्रदेशात मॅगी नुडल्समध्ये शिसे आणि अजिनोमोटो (मोनोसोडिअम ग्लुटामेट) यांचा अंश आढळल्याच्या पार्श्वभूमीवर, मुंबई, पुणे व नागपूर येथील मॅगीचे नमुने महाराष्ट्राच्या अन्न व औषध प्रशासनाने (एफडीए) तपासणीसाठी प्रयोगशाळेत पाठविले आहेत.
लखनऊ व इतर काही ठिकाणी मॅगीमध्ये शिसे आणि अजिनोमोटो अधिक प्रमाणात आढळल्यानंतर त्याची बाजारातील पॅकेट्स मागे घेण्याचे आदेश स्थानिक अन्न व औषध प्रशासनाने बुधवारी दिले. त्या धर्तीवर महाराष्ट्रात मॅगीचे नमुने घेण्यात आले असून, येत्या दोन दिवसांत त्यांचे निकाल येणे अपेक्षित आहे, असे एफडीए आयुक्त कार्यालयातर्फे सांगण्यात आले.
‘मोनोसोडिअम ग्लुटामेटचा थेट वापर आम्ही मॅगीमध्ये करीत नाही, असा दावा मॅगीउत्पादक कंपनीने केला आहे. त्यामुळे हे घटक मॅगीमध्ये थेट वापरण्यात आले की टोमॅटो किंवा इतर फळभाज्यांमधून ते त्यात आले, हे शोधून काढणे कठीण आहे’, असे खाद्यशास्त्रज्ञ सांगतात. ‘याच प्रकारची अनेक उत्पादने बाजारात असतात, व खासकरून चिनी पदार्थांमध्ये असलेल्या अजिनोमोटोमुळे लहान मुलांना या चवीची पटकन भुरळ पडते’, असे सांगितले जाते. अजिनोमोटो नेमके किती वापरावे किंवा वापरूच नये का, असे सुस्पष्ट निकष कोठे आढळलेले नाहीत, त्यामुळे याबाबतही संभ्रम आहे. शिशाचे प्रमाण आढळल्यास मात्र ते गंभीर ठरेल, असे अभ्यासकांचे मत आहे.
मॅगीची आणखी तपासणी
नवी दिल्ली : नेस्ले इंडियाच्या ‘मॅगी’मध्ये शिसे आणि एमएसजीचे प्रमाण अधिक आढळून आल्याने उत्तर प्रदेशातील दोन लाख पाकिटे परत मागवण्याचा आदेश येथील एफीडएने बुधवारी कंपनीला दिले होते. या पार्श्वभूमीवर आणखी काही पाकिटांमधील मॅगीचे नमुने तपासण्यासाठी पाठविले आहेत. याचा अहवाल अद्याप आलेला नाही, अशी माहिती बारबांकी जिल्ह्याचे एफीडीएचे अधिकारी व्ही. के. पांडे यांनी दिली.