‘पल्मोनरी अँटरेसिया’ या आजाराने ग्रस्त असलेल्या अवघ्या १० दिवसांच्या बाळावर दुर्मिळ ओपन हार्ट सर्जरी करण्यात आली. या शस्त्रक्रियेमुळे या बाळाला जीवदान मिळाले. बाणेर येथील ज्युपिटर हॉस्पिटलमध्ये ही शस्त्रक्रिया यशस्वी करण्यात आली आहे.
या बाळाचा सोलापूर येथे जन्म झाला होता. जन्मल्यावर त्याला श्वास घेण्याचा त्रास होत होता. त्रास झाल्यानंतर त्याला पुण्यात सरकारी हॉस्पिटलमध्ये दाखल करण्यात आले. त्या वेळी अद्ययावत उपचारांची गरज असल्याने त्याला पुन्हा ज्युपिटर हॉस्पिटलमध्ये हलविण्यात आले. बाल हृदयरोग तज्ज्ञ डॉ. राहुल सराफ यांनी बाळाची तपासणी करून रोगाचे निदान करण्यासाठी इको कार्डियोग्राफीचा वापर केला. त्या वेळी बाळाच्या हृदयाच्या उजव्या भागातून रक्तस्राव बंद झाल्यामुळे फुफ्फुसांपर्यंत रक्त पोहोचत नव्हते. त्यामुळे डॉक्टरांनी ओपन हार्ट सर्जरी करण्याचा निर्णय घेतला. जन्मल्यावर बाळाचे शरीर निळ्या रंगाचे होते. त्याचे वजन २. १ किलो होते. बाळाची स्थिती नाजूक असल्याने डॉक्टरांसाठी अतिशय ही शस्त्रक्रिया करणे हे आव्हानाचे काम होते. त्यात हृदयातील ब्लॉकेज काढण्यात आले. फुफ्फुसांपर्यंत जाणारा रक्तस्त्राव सुरळीत करण्यात आला. दहा दिवसांच्या बाळावर बालहृदयरोग तज्ज्ञ डॉ. अभिजित नाईक, डॉ. राहुल सराफ यांनी शस्त्रक्रिया केली. अतिदक्षता विभागाचे तज्ज्ञ डॉ. श्रीनिवास तांबे यांचाही समावेश होता.
डॉ. अभिजित नाईक म्हणाले, ‘हा रोग अतिशय दुर्मिळ आहे. जन्मजात हृदयविकार एक लाखांपैकी चार जणांना झालेला होतो. शस्त्रक्रिया केलेल्या बाळाच्या घरची आर्थिक परिस्थिती अतिशय हलाखीची आहे. पेशंटचे वडील सोलापूरमध्ये वेल्डिंगचे काम करतात. शस्त्रक्रियेसाठी पैसे उभे करणे त्यांच्यासाठी अशक्य होते. म्हणून ज्युपिटर फाउंडेशन व मुकुल माधव फाउंडेशने ‘हृदय स्पर्श’ योजनेअंतर्गत या शस्त्रक्रियेचा व औषधांचा खर्च केला.’