उत्तर प्रदेशातील अमरोहा जिल्ह्यात दारूच्या नशेत एकाने चक्क साप गिळला. सापाला गिळल्यानंतर त्याचा ४ तासांनी मृत्यू झाला. महिपाल सिंह असं या व्यक्तिचं नाव आहे. तो ४० वर्षांचा होता. सापाला गिळतानाचा त्याचा व्हिडिओ सोशल मीडियावर मोठ्या प्रमाणात व्हायरल झालाय.
महिपाल सिंह हा कामगार होता. घटनेवेळी तो दारूच्या नशेत होता. रस्त्यालगत फिरत असलेल्या एका सापाला त्याने पकडलं. थोड्याच वेळात गावातील काही लोकं आली आणि त्याला सापासोबत खेळण्यासाठी उकसवू लागली. ते त्याचं मोबाइलमध्ये रेकॉर्डींग करत होते. यामुळे महिपाल सिंह सापासोबत खेळू लागला. मग कुणीतरी महिपालला सापाला तोंडात पकडण्याचं आव्हान दिलं. दारूच्या नशेत असलेल्या महिपालने सापाला तोंडात ठेवताच साप त्याच्या घशात घुसला. महिपालने बराच वेळ उलट्या केल्या. पण साप बाहेर आला नाही. यानंतर महिपालला लगेचच रुग्णालयात दाखल करण्यात आलं. तिथे ४ तासांनी महिपालचा मृत्यू झाला. महिपालला एक मुलगा, तीन मुली आणि पत्नी आहे.
पोलिसांनी या घटनेची दखल घेतली आहे. तसंच व्हिडिओची तपासणी सुरू केली आहे. सापाला तोंडात पकडण्यासाठी महिपालला कुणी उकसवलं, याचाही तपास पोलिस करत आहेत.