कुलाब्यात एका उच्चभ्रू कुटुंबात काम करणाऱ्या स्वयंपाक्याने मालकीण आणि तिच्या मुलीला जेवणातून उंदीर मारण्याचे औषध दिल्याचा धक्कादायक प्रकार उघडकीस आला आहे. कुलाबा पोलिसांनी रिजउल हक मंडल ऊर्फ मिलॉन (३३) याला अटक केली असून त्याने असे का केले असावे, याबाबत पोलिस तपास करत आहेत.
कुलाबा येथील बख्तावर इमारतीत झिनिया खाजोटिया (६५) या दोन नोकर आणि स्वयंपाकी मिलॉन याच्यासोबत राहतात. त्यांचे दोन मुलगे आणि विवाहित मुलगी परदेशात वास्तव्यास आहेत. झिनिया ६ ऑगस्ट रोजी सिंगापूर येथून मुंबईत परतल्या. तेव्हापासून घरातील जेवणाचे पदार्थ खाल्ल्यानंतर त्यांना गुंगी आणि झोप येऊ लागली. हे प्रकार दररोज सुरू होते. स्वयंपाकी मिलॉन याने काहीही खायला दिले की, असेच व्हायचे. त्यात ११ ऑगस्ट रोजी त्यांची मुलगी अमेरिकेहून कुलाब्यात काही दिवसांसाठी राहण्यास आली. मुलीला झिनिया यांनी हा प्रकार सांगितला. मुलीने ऑम्लेट आणि टोमॅटोची चटणी खाल्ल्यावर तिलाही झोप येऊ लागली. काही दिवस असे गेल्यावर झिनिया यांना अशक्तपणा आला. झिनिया यांना घेऊन त्यांची मुलगी टाटा रुग्णालयात ओळखीच्या डॉक्टरकडे घेऊन गेली. याठिकाणी तपासणीसाठी डॉक्टरांनी दोघींच्या रक्ताचे नमुने घेतले. २४ ऑगस्ट रोजी रक्ताच्या नमुन्याचे अहवाल आले, त्यावेळी दोघींच्या रक्तामध्ये ‘थॅलियम’ हा विषारी पदार्थ आढळून आला. उंदीर मारण्यासाठी वापरले जाणारे विष अन्नातून शरीरात गेल्यामुळे हे झाल्याचे डॉक्टरांनी सांगितले.
वैद्यकीय अहवालानंतर सर्व प्रकार लक्षात आल्याने झिनिया आणि तिच्या मुलीला धक्का बसला. त्यांनी याबाबत कुलाबा पोलिस ठाण्यात तक्रार केली. पोलिसांनी प्राथमिक चौकशी करून मिलॉन याला अटक केली. त्याच्या या कटात इतरही नोकरांचा समावेश होता का? याबाबत कुलाबा पोलिस चौकशी करत आहेत.