बॉलिवूडचा प्रसिद्ध डान्सर अभिजीत शिंदे याने बुधवारी आत्महत्या केली. भांडुप येथील राहत्या घरी अभिजीतने पंख्याला गळफास घेतला. घटनास्थळावरून पोलिसांना चिठ्ठी सापडली असून यात त्याने बँक खाते मुलीच्या नावावर केल्याचे म्हटले आहे. याप्रकरणी भांडुप पोलिस अधिक तपास करीत आहेत.
भांडुप व्हिलेज मार्गावरील एका सोसायटीमध्ये अभिजीत राहत होता. त्याची पत्नी गेल्या तीन महिन्यांपासून लहान मुलीसह माहेरी राहत आहे. यामुळे अभिजीत तणावाखाली होता. बुधवारी सकाळी घरात कुणी नसताना अभिजीतने घरातील पंख्याला गळफास घेतला. बराच वेळ अभिजीतने दरवाजा उघडला नाही त्यावेळी हा प्रकार लक्षात आला. भांडुप पोलिसांनी घटनास्थळी जाऊन अभिजीतला जवळच्या रुग्णालयात नेले. पण डॉक्टरांनी त्याला मृत घोषित केले. अभिजीतने सलमान खान, रणबीर कपूर, तुषार कपूर, रणवीर सिंग यांसारख्या बड्या अभिनेत्यांसोबत काम केले आहे.