यू ट्युबवरील क्लिप्स पाहून शटर उचकटविण्याचे तंत्र शिकून चोरी करणाऱ्या अठरा वर्षीय युवकास एका चोरीच्या गुन्ह्यात युनिट-२ च्या पथकाने अटक केल्याची माहिती वरिष्ठ पोलिस निरीक्षक दिनेश बर्डेकर यांनी दिली. यूट्युबसारख्या साइटवर जाऊन शटर वाकविण्याची कला ट्रिक पाहून अठरा वर्षीय ऋषिकेश उर्फ खंड्या सुरेश चंद्रमोरे (रा. उपनगर) याने शहरात एक चोरी केली होती. युनिट दोनच्या कर्मचाऱ्यांनी या युवकास ताब्यात घेऊन चौकशी केली असता त्याने कामगारनगर येथील मोबाइलच्या दुकानाचे शटर वाकवून चोरी केल्याचे उघड झाले. चंद्रमोरे यास ताब्यात घेतल्यानंतर त्याने या गुन्ह्याची कबुली दिली असून, यूट्युबवरून ही पद्धत शिकल्याचे सांगितले. संशयितास पकडण्यासाठी सहाय्यक पोलिस निरीक्षक अभिजित सोनवणे, रवींद्र सहारे, महेश इंगोले, विजय लोंढे, राजेंद्र जाधव, श्रीराम सपकाळ, रमेश घडवजे यांच्यासह पोलिस कर्मचारी प्रयत्नशील होते.