भरदिवसा रिक्षातून प्रवास करणेही महिलांसाठी सुरक्षित राहिले नसल्याचे सिद्ध करणाऱ्या घटना वारंवार शहरात घडत असून बुधवारी त्याची पुनरावृत्ती झाली. शेअर रिक्षातून प्रवास करणाऱ्या एका विद्यार्थिनीचा रिक्षातीलच सहप्रवाशाने विनयभंग केल्याची घटना घडली आहे. संबंधित आरोपीला अटक करण्यात आली असून ठाणे सत्र न्यायालयाने आरोपीची रवानगी न्यायालयीन कोठडीत केली आहे.
मासमीडियाचे शिक्षण घेणारी १९ वर्षीय विद्यार्थिनी ठाण्यातील कोलबाड भागात राहते. मंगळवारी रात्री गावदेवी येथून कॅडबरीकडे जाणाऱ्या शेअर रिक्षातून प्रवास करत होती. त्यावेळी रिक्षात तिच्या शेजारी आरोपी सागर हुंम्बरे (२९ रा. लक्ष्मीनगर, चिरागनगर) हा बसला होता. खोपट सिग्नल ते नौपाडादरम्यान आरोपीने अश्लील
चाळे करत विद्यार्थिनीचा विनयभंग केला. विद्यार्थिनीच्या तक्रारीनंतर सागर याच्याविरुद्ध नौपाडा पोलिस ठाण्यात विनयभंगाचा गुन्हा दाखल करण्यात आला. तसेच आरोपीला रात्री उशिरा पोलिसांनी अटक करत दुसऱ्या दिवशी ठाणे न्यायालयात हजर करण्यात आले होते. हा प्रकार समोर आल्यानंतर नौपाडा पोलिस ठाण्यातील वरिष्ठ अधिकाऱ्यांनी धाव घेत आरोपीविरुद्ध कारवाई देखील केली. मात्र या प्रकारानंतर शेअर रिक्षातून प्रवास करणाऱ्या महिलांच्या सुरक्षिततेचा प्रश्न निर्माण झाला आहे. कारण अनेकदा शेअर रिक्षाचालक क्षमतेपेक्षा अधिक प्रवासी घेतात. अशा रिक्षाचालकांवर वाहतूक पोलिसांकडून कोणतीच कारवाई होत नसल्याचे चित्र आहे.