ठाण्यात एक माथेफिरू आलाय, रस्त्यावरून चालणाऱ्या लहान मुलांना तो एक इंजेक्शन टोचतो. त्यामुळे इन्फेक्शन होऊन सूज येते… असा मेसेज त्या तरुणाच्या सीसीटीव्ही फुटेजसह व्हायरल झाला आणि पालकांमध्ये प्रचंड भीती पसरली. नौपाडा पोलिसांनी तत्परतेने तपास करत या तरुणाला पकडले. त्यानंतर एका सुशिक्षित कुटुंबातला हा मुलगा मनोरुग्ण असल्याचे निष्पन्न झाले. तसेच, तो कोणतेही इंजेक्शन नव्हे तर हातातला पेन मुलांना टोचत होता, असेही तपासात निष्पन्न झाल्यानंतर सर्वांचाच जीव भांड्यात पडला.
सहा ऑगस्ट रोजी ठाण्यातील पाचपाखाडी परिसरात रस्त्यावरून चालणाऱ्या काही लहान मुलांना या तरुणाने हातातल्या टोकदार वस्तू टोचली होती. त्याबाबतची तक्रार एका पालकाने नौपाडा पोलिसांकडे नोंदवली. त्याचवेळी या भागातील काही व्यापाऱ्यांच्या दुकानांमधील सीसीटीव्ही फुटेजमध्ये हा तरुण एका शाळकरी मुलाला काही तरी टोचताना आढळला होता. हे फुटेज सोशल मीडियावर व्हायरल झाले. मात्र, त्या तरुणाने मुलाला काय टोचले होते, याबाबतची ठोस माहिती कुणालाही नव्हती. मात्र, तो तरुण एक इंजेक्शन मुलांना टोचत असून त्यामुळे इन्फेक्शन होत असल्याचे मेसेज सोशल मीडियावरून व्हायरल करण्यात आला होता. वेगवेगळ्या शाळांतील पालकांच्या व्हॉट्सअॅप ग्रुपवर हे मेसेज धडकल्याने पालिका चिंताग्रस्त झाले होते. मुलांबाबतची चिंता व्यक्त करणारी चर्चा या ग्रुपवर सुरू झाली होती. त्याचदरम्यान नौपाडा पोलिसांनी या तरुणाचा शोध सुरू केला होता.
या तरुणाचा फोटो दाखवत पोलिसांनी सभोवतालच्या भागात या तरुणाचा शोध सुरू केला. हा तरुण श्री जी व्हिला या सोसायटीत रहात असल्याची माहिती मिळाल्यानंतर पोलिस तिथे धडकले. चौकशीसाठी या तरुणाला पोलिसांनी ताब्यात घेतले होते. या तरुणाच्या वडिलांचा इम्पोर्ट-एक्स्पोर्टचा व्यवसाय असून त्याची बहीण डॉक्टर आहे. तसेच, हा तरुणसुध्दा पदवीधर असल्याचे पोलिसांनी सांगितले. कुटुंबीयांच्या म्हणण्यानुसार गेल्या काही वर्षांपासून या तरुण मनोरुग्ण असल्याची माहिती पोलिस उपायुक्त डॉ. डी. एस. स्वामी यांनी दिली.
वडील ओरडले म्हणून…
आजवर घरीच काहीसे विचित्र प्रकार करणाऱ्या या तरुणाने पहिल्यांदाच सार्वजनीक ठिकाणी असा प्रकार केल्याचे त्याच्या पालकांनी सांगितले. मात्र, काही कारणामुळे वडील रागावल्यानंतर हा तरुण घराबाहेर पडला होता. वडिलांवरील रागामुळे अस्वस्थ झाल्यामुळे हा प्रकार केल्याची कबुली त्याने दिली आहे. या तरुणावर प्रतिबंधात्मक कारवाई म्हणून गुन्हा दाखल करण्यात आला असून रात्री उशिरापर्यंत तो पोलिसांच्याच ताब्यात होता.