पालघर तालुक्यातील मुरबे गावच्या एका मच्छिमाराच्या जाळ्यात सापडलेल्या घोळ माशाच्या ७२० ग्रॅम वजनाच्या बोथाला (फुफ्फुसांची पिशवी) लिलावात चक्क ५ लाख ५० हजार रु. मिळाले. बोथाला मिलालेला हा दर आतापर्यंतचा उच्चांक समजला जातो.
पालघर जिल्ह्यातील किनारपट्टीवरील सातपाटी, मुरबे, डहाणू, केळवे, एडवण, कोरे, दातीवरे, अर्नाला, नायगाव आदी बंदरांत घोळ, कोत, वाम असे मासे पकडण्यासाठी वागरा पद्धतीच्या जाळ्यांचा मोठ्या वापर प्रमाणात केला जातो. मासळी बाजारात दाढा, घोळ या माशाच्या पोटातील बोथाला व्यापाऱ्यांकडून अधिक दर मिळतो. अंतरराष्ट्रीय बाजारपेठेत घोळ, दाढा, वाम, कोत, शिंगाळा आदी माशांच्या बोथालाही चांगली मागणी असून, भारतातील उत्तर प्रदेश, बिहार, उत्तराखंड या राज्यांतून पालघर जिल्ह्यात व मुंबईत स्थायिक झालेल्या विशेषतः मुस्लिम समाजातील व्यापाऱ्यांकडून हे बोथ खरेदी केले जातात. घोळ व दाढा माशाच्या ८०० ते एक हजार रुपये प्रति किलो दर मिळतो. नर माशाच्या बोथाला सर्वाधिक मागणी असून, मादीच्या बोथास पाच ते दहा हजार रु.पर्यंत किंमत मिळते. माशाच्या बोथाचा वापर नैसर्गिक सौंदर्यप्रसाधने बनविण्यासाठी तसेच, शस्त्रक्रियेदरम्यान लागणारे टाके घालण्यासाठी व औषधे बनविण्यासाठी होत असल्याचे सांगितले जाते.