सातव्या वेतन आयोगासाठी सरकारी कर्मचाऱ्यांनी पुकारलेला तीन दिवसांचा संप सुरू झाला आहे. सकाळपासूनच कर्मचाऱ्यांनी विविध सरकारी कार्यालयाबाहेर जमून सरकारविरोधात संताप व्यक्त करत ठिय्या आंदोलन सुरू केले आहे. त्यामुळे सरकारी कार्यालयांमध्ये शुकशुकाट पसरला असून सर्व कामकाज ठप्प झाले आहे. त्यामुळे या संपाचा सर्वसामान्य जनतेला प्रचंड त्रास सहन करावा लागत आहे. तर या संपात शिक्षकही सहभागी झाल्याने शाळांनाही अघोषित सुट्टी देण्यात आली आहे.
मुंबईत जेजे रुग्णालयातील सर्व कर्मचारी संपावर गेले आहेत. मात्र रुग्णांना त्रास होऊ नये म्हणून अत्यावश्यक सेवा सुरू ठेवण्यात आल्या आहेत. जेजेच्या तब्बल ३४०० कर्मचाऱ्यांनी गेटबाहेर जमून सरकारविरोधात जोरदार घोषणाबाजी करत सातवा वेतन आयोग लागू करण्याची मागणी केली. तसेच मंत्रालय, पालिकेसह अनेक सरकारी कार्यालयातील कर्मचारी आज कामावर आलेच नाहीत. त्यामुळे या कार्यालयांमध्ये शुकशुकाट पसरला आहे. तर ठाणे जिल्ह्यातही ४ हजार कर्मचारी संपावर गेल्याने ठाणेकरांचे हाल होत आहेत. शिवाय महाविद्यालयीन शिक्षकेत्तर कर्मचारी तसेच आरोग्य सेवेतील कर्मचाऱ्यांनीही या संपाला पाठिंबा देवून सरकारी कर्मचाऱ्यांना बळ दिलं आहे.
आज सकाळी नागपूरच्या शासकीय मुद्रणालयाबाहेर शेकडो कर्मचारी जमले होते. या कर्मचाऱ्यांनी सातवा वेतन आयोग तात्काळ लागू करण्याची जोरदार मागणी केली. तर औरंगाबादच्या घाटी रुग्णालयातील कर्मचाऱ्यांनीही संपात भाग घेत सरकारचा निषेध नोंदवला. एकही कर्मचारी कामावर हजर न झाल्याने घाटी रुग्णालयात रुग्णांना प्रचंड गैरसोयीचा सामना करावा लागत आहे. या शिवाय औरंगाबादच्या शासकीय वैद्यकीय महाविद्यालय व रुग्णालय, ईएसआयसी रुग्णालय, जिल्हाधिकारी कार्यालय, सेतू सुविधा केंद्र आणि विभागीय आयुक्तालयातील १०० टक्के कर्मचारी संपावर गेले आहेत. आपत्कालीन व्यवस्था म्हणून रुग्णालयातील महत्त्वाच्या शस्त्रक्रिया करण्यात येणार आहेत. शिवाय अपघात विभागात काही ब्रदर्स आणि सिस्टर कामावर हजर झाले आहेत.
राज्यातील ४ लाख प्राथमिक शिक्षकही आजच्या संपात सहभागी झाले आहेत. हे कर्मचारी तिन्ही दिवस संपात सहभागी होणार आहेत. एकूण ४ लाख प्राथमिक शिक्षक संपात सहभागी झाल्याने राज्यातील ७५ हजार प्राथमिक शाळांना अघोषित सुट्टी देण्यात आली आहे, अशी माहिती महाराष्ट्र राज्य प्राथमिक शिक्षक संघाचे प्रदेशाध्यक्ष बाळकृष्ण तांबारे यांनी दिली.