नाशिक: पंचवटी येथे अनैतिक संबंधातून तिघीजणींना पेटवून दिल्याची धक्कादायक घटना घडली आहे. या जळीत कांडात एका नऊ महिन्याच्या मुलीचा मृत्यू झाला असून तिन्ही महिलांची प्रकृती चिंताजनक आहे. याप्रकरणी पोलिसांनी गुन्हा दाखल केला असून फरार आरोपीचा शोध घेत आहे.
आज पहाटे साडेचार-पाचच्या सुमारास नाशिकच्या पंचवटीमध्ये ही धक्कादायक घटना घडली. एका परप्रांतियाचं देव्हरे नावाच्या महिलेशी प्रेमसंबंध होते. ही महिला पंचवटी येथे दोन दिवसापूर्वीच राह्यला आली होती. तिची मुलगी आपल्या नऊ महिन्याच्या मुलीसह तिला भेटायला आली होती. आज पहाटे या महिलेचं आणि तिच्या प्रियकराचं कडाक्याचं भांडण झालं. यावेळी घरात सदर महिला, तिची आई आणि मुलगीही होते. भांडण वाढल्यानंतर आरोपीने या तिघींच्या अंगावर रॉकेल ओतून त्यांना पेटवून दिलं आणि तिथून पळ काढला. या तिन्ही महिलांनी जोरजोरात टाहो फोडल्याने शेजाऱ्यांनी तात्काळ धाव घेत आग विझवली. त्यानंतर त्यांना रुग्णालयात दाखल करण्यात आले. यावेळी घरामध्ये प्रचंड धूर झाला होता. त्यामुळे घरातील नऊ महिन्याच्या मुलीचा गुदमरून मृत्यू झाल्याचं सांगण्यात येतं. आगीमुळे घरातील अख्खं सामान जळून खाक झालं आहे. दरम्यान, या तिन्ही महिलांवर रुग्णालयात उपचार सुरू असून त्यांची प्रकृती चिंताजनक असल्याचं सांगण्यात येतं.
हा आरोपी उत्तर प्रदेशातील मथुरेचा रहिवासी असल्याचं सांगण्यात येतं. त्याचा शोध घेण्यासाठी पंचवटी पोलिसांनी तीन पथकं स्थापन केली आहेत. याप्रकरणी गुन्हा नोंदविण्यात आला असून या जळीत कांडामागचं नेमकं कारण शोधून काढण्यात येत आहे.