सरकारी नोकरी असल्याचे नमूद करून २५ तरुणींची फसवणूक करणाऱ्या ठाण्याच्या तरुणाला मुंबई पोलिसांच्या गुन्हे शाखेच्या पोलिसांनी अटक केली आहे. कृष्णा चंद्रसेन देवकाते (३१) असे त्याचे नाव असून, त्याने या तरुणींना सुमारे ५० लाखांना फसवल्याचे समोर आले आहे
चारकोप येथे राहणाऱ्या तरुणीच्या तक्रारीवरून पोलिसांनी कृष्णाला अटक केली. जीवनसाथी आणि शादी डॉट कॉमवर कृष्णाने प्रोफाइल तयार केले होते. यात त्याने दूरसंचार नियामक प्राधिकरण या ठिकाणी कायमस्वरूपी नोकरी करत असल्याचे लिहिले होते. मनाप्रमाणे स्थळ मिळाल्याने या तरुणीने कृष्णाला पसंती (रिक्वेस्ट) कळवली. त्यानेही पसंती कळवल्यानंतर मोबाइल क्रमांकांची देवाण-घेवाण झाली. दोघांचे बोलणे वाढले व कृष्णाचे वागणेही या तरुणीला आवडायला लागले. लग्न करण्याचे ठरल्यानंतर दोघांची जवळीक अजूनच वाढली. तरुणीचा विश्वास संपादन करत कृष्णा तिच्या डेबिट आणि क्रेडिट कार्डचा वापर करू लागला. काही दिवसानंतर तो तरुणीला टाळायला लागला. याबाबत तिने चारकोप पोलिस ठाण्यात तक्रार केल्यानंतर मुंबई गुन्हे शाखा युनिट ११ च्या पथकाने तपास सुरू केला.
दोन्ही संकेतस्थळे आणि इतर तांत्रिक बाबी तपासल्यानंतर कृष्णा ठाणे येथे राहत असल्याची माहिती मिळाली. त्यानुसार वरिष्ठ पोलिस निरीक्षक चिमाजी आढाव यांच्या मार्गदर्शनाखाली निरीक्षक अरविंद घाग, सहाय्यक निरीक्षक शरद झिने, नितीन उतेकर यांच्यासह पथकाने ठाण्यातून त्याला शोधून काढले. चौकशीत कृष्णाने २५ तरुणींना अशाप्रकारे फसवल्याचे समोर आले. त्याच्या विरोधात चारकोप, वांद्रे-कुर्ला कॉम्प्लेक्स, नवी मुंबईतील कोपर खैरणे, पुणे येथील हडपसर पोलिस ठाण्यांत गुन्हे आहेत. एका गुन्ह्यात त्याने तुरुंगात शिक्षाही भोगली असल्याचे पोलिसांनी सांगितले.