ठाण्यातील सर्वसामान्य कुटंबातील गौरव नेहमीच शिक्षणामध्ये अग्रेसर होता. बारावीपर्यंत वर्गात नेहमीच पहिला क्रमांक पटकावत. अथक प्रयत्न, चिकाटी आणि विश्वासाच्या जोरावर अवघ्या २१ वर्षाच्या गौरव वसंत म्हेत्रे याने भारतीय सेनादलापदी लेफ्टनंट पदावर भरारी घेतली आहे.राष्ट्रीय संरक्षण अकादमी (एनडीए), खडकवासला येथे तीन वर्षे आणि डेहराडून येथील इंडियन मिलिटरी अॅकॅडमी येथील एक वर्षाचा खडतर प्रवास करत गौरवने लेफ्टनंट पद मिळवले आहे. गौरव भारतीय सेनादलाच्या तोफखाना दलात एक जुलैपासून रूजू होत आहे.
ठाण्यामधील पाचपाखाडी येथील गौरव हा सरस्वती मंदिर ट्रस्टचा माजी विद्यार्थी, वडील खासगी कंपनीत नोकरीला तर आई खासगी क्लास घेत संसाराला हात भार लावत आहे. भाऊ तेजस याने या क्षेत्रात येण्यास त्याला प्रोत्साहन दिले आणि आई-वडिलांनी त्याच्या स्वप्नाला साथ दिली. शालेय वयातच भविष्यात काय करायचे, हे त्याने मनाशी ठाम ठरवले होते. हा प्रवास खूप रोमांचक होताच, शिवाय वेळोवेळी मिळणारे अनुभव जोडत आपल्या ध्येयापर्यंत पोहोचण्याचा प्रयत्न केल्याचे गौरव सांगतो.
सहावीपर्यंतच शिक्षण सरस्वती मंदिर ट्रस्टमध्ये घेतले. त्यानंतर सातवी व आठवी साताऱ्यामधील सैनिकी शाळेत पूर्ण केले. या प्रवासात दिनक्रमातील कडक शिस्त आणि या क्षेत्रात दिले जाणारे प्रशिक्षण आयुष्यासाठी खूप मोलाचे ठरल्यामुळे आयुष्याला वेगळी दिशा मिळाली. खडकवासला येथे तीन वर्षे राष्ट्रीय संरक्षण अकादमी, त्यानंतर इंडियन मिलिटरी अकादमीमध्ये गौरवने राज्यात पहिला क्रमांक मिळवत भारतीय सेनादलात लेफ्टनंट पदावर यशाची झेप घेतली. यानिमित्त बुधवारी सरस्वती मंदिर ट्रस्टच्या वतीने जनरल अरुण वैद्य यांच्या पुतळ्यास पुष्पचक्र अर्पण केल्यानंतर लेफ्टनंट गौरव म्हेत्रे याला सैनिकांनी सलामी दिली. तसेच ट्रस्टचे विश्वस्त सुरेंद्र दिघे यांच्या हस्ते गौरवचा सत्कार करण्यात आला. यावेळी विश्वस्त पुरुषोत्तम आगवणे, मुख्याध्यापक यशवंत शिंदे व शिक्षकांच्या हस्ते दहावीतील गुणवंत विद्यार्थ्यांचाही सत्कार करण्यात आला.