गुरगाव येथील एका मूव्हर्स अँड पॅकर्स कंपनीचं नाव या बॉक्सवर होतं. त्याद्वारे पोलीस अलिगढला राहणाऱ्या जावेदपर्यंत पोहोचले. जावेदला शारजाहवरून हे सामान पाठवण्यात आलं होतं. जावेदने सांगितलं की कन्साइनमेंटसोबत आलेल्या बॉक्समध्ये त्याने घरातलं सामान ठेवलं होतं. हे बॉक्स त्याने दिल्लीच्या शाहीन बाग भागातल्या आपल्या फ्लॅटमध्ये ठेवले होते. त्याने सांगितलं की हा फ्लॅट २०१५ पासून रिकामाच होता. मार्च मध्ये तो भाड्याने द्यायचा निर्णय त्याने घेतला. साजिद आणि त्याचा भाऊ इश्तियाक यांना जावेदने हा फ्लॅट भाड्याने दिला. पण जूनमध्ये दोघांनी घर रिकामे केले. पोलिसांनी तपास केला आणि शाहीन बागमधून साजिद आणि इश्तियाकला अटक केली.
२०१६ मध्ये साजिद आपल्या पत्नीसोबत दिल्लीला आला होता. त्याच्याकडे कायमस्वरुपी नोकरी नव्हती. मुलं झाल्यावर घरखर्च वाढला. यावरून पती-पत्नीत भांडणं होऊ लागली. याच दरम्यान चंपारण येथे राहणाऱ्या अन्य एका महिलेशी साजिदची जवळीक वाढली. २० जूनला पती-पत्नीत पुन्हा वाद झाला आणि त्यातच साजिदने पत्नी जुही हिची गळा दाबून हत्या केली. यानंतर त्याने मोठा भाऊ इश्तियाकला बोलावून सर्व हकिकत सांगितली. दोघांनी मृतदेहाचे तुकडे केले आणि खोक्यात भरले. नंतर त्यांनी सर्वात मोठा भाऊ हसमतला कळवले. त्याने गाडीची व्यवस्था केली आणि या गाडीतूनच मृतदेह असलेला बॉक्स नेऊन जंगलात ठेवण्यात आाला.