नाशिक येथे तांत्रिक बिघाड झाल्यामुळे लष्कराचं लढाऊ विमान कोसळलं असून या दुर्घटनेत संपूर्ण विमान जळून खाक झालं आहे. सकाळी सव्वा अकराच्या सुमारास घडलेल्या या दुर्घटनेत सुदैवाने कोणतीही जीवितहानी झाली नाही.
नाशिकच्या पिंपळगावजवळ वावीठुशी गावातील एका शिवारात लष्कराचं मिग विमान कोसळलं. आज सकाळी ११. १५ वाजता ही घटना घडली. तांत्रिक बिघाड झाल्यामुळे हे विमान कोसळलं असून या दुर्घटनेत विमानाचा अक्षरश: कोळसा झाला आहे. जिल्हा प्रशासनाने दिलेल्या माहितीनुसार, हे लष्कराचे विमान होते. या विमानात दोन पायलट होते. विमानात तांत्रिक बिघाड झाल्याचं लक्षात येताच या दोन्ही पायलटने पॅराशूटच्या आधारे विमानातून उड्या मारल्या. त्यानंतर हे विमान कोसळले. या दुर्घटनेत कोणतीही जीवितहानी झाली नाही. जिल्हा प्रशासनाने वेळीच संबंधित विभागांना सूचना दिल्या असून पोलीस तसेच मदत कार्यासाठी १ हेलिकॉप्टर घटनास्थळी पाठविण्यात आले आहे. दरम्यान, शिवारात विमान कोसळल्याची माहिती मिळताच पंचक्रोशीतील ग्रामस्थांनी घटनास्थळी एकच गर्दी केली होती. त्यामुळे ग्रामस्थांना आवरताना पोलिसांच्या नाकेनऊ येत होते.