सुवर्णठेवींवर मिळणारे व्याजरुपी उत्पन्न हे संपत्ती कर, आयकर आणि भांडवली लाभ करापासून मुक्त असून, सहभागी होणाऱ्यांना केवळ ‘केवायसी’ची पूर्तता करण्याची आवश्यकता आहे. कच्च्या आराखड्यानुसार ग्राहकांना सोनेखरेदीची पावती अथवा पुरावा सादर करण्याची आवश्यकता नाही. तसेच, यापूर्वी संपत्ती कराचा भरणा केल्याचा पुरावाही सादर करण्याची आवश्यकता नाही. ‘योजनेत सोने जमा करण्यासाठी कोणतेही प्रश्न विचारण्यात येणार नाहीत, हेच योजना यशस्वी होण्यामागील गमक ठरू शकते,’ अशी माहिती मोतीलाल ओसवाल कमोडिटीजचे सहायक संचालक किशोर नर्ने यांनी दिली. योजनेमुळे अतिश्रीमंत व्यक्तींनाही समोर येण्यास कोणताही अडसर राहणार नाही, असेही नर्ने म्हणाले.
देशातील घराघरात मिळून थोडेथोडके नव्हे तर २४,००० टन सोन्याचा साठा असून, त्याची किंमत ६३ लाख कोटी रुपयांच्या घरात आहे. एवढ्या प्रमाणात असणारा धातू नुसताच ठेवण्यापेक्षा त्याद्वारे करमुक्त उत्पन्न व्याजरूपाने मिळविण्याची संधी सरकारने उपलब्ध केली आहे.