आरे कॉलनीसारख्या मुंबईतील सर्वात मोठ्या हरित पट्ट्यावर विकास नियोजन आराखड्यात आलेला घाला आणि मेट्रो कारशेडसाठी ‘आरे’तील अडीच हजारहून जास्त झाडांवर आलेली संक्रात या घटना ताज्या असताना आता संजय गांधी राष्ट्रीय उद्यानातील डोंगरच कापला जात असल्याचे धक्कादायक वास्तव उघडकीस आले आहे. गेल्या काही वर्षांपासून गोरेगाव पूर्वेकडील दिंडोशी आयटी पार्कच्या मागील भागात हा प्रकार सुरू असून, सुमारे २५ एकरचा हरित पट्टा पद्धतशीरपणे नष्ट केला जात आहे.
वनजमिनींवरील निवासी बांधकामे कायम करण्याचा निर्णय सुप्रीम कोर्टाने दिला आहे. मात्र, उद्यानाच्या हा हरित पट्टा ‘बफर झोन’ मध्ये येत असल्याने साहजिकच त्या ठिकाणी कोणत्याही स्वरूपाची ढवळाढवळ अपेक्षित नाही. तेथील वनराईही नष्ट करण्याची मुभा देण्यात आलेली नाही. तरीही २५ एकर पट्ट्यातील हिरव्यागार डोंगराचे सपाटीकरण करण्याचे काम सुरू आहे.
यासंदर्भात आमच्याकडे तक्रार आली असून, चौकशीसाठी सहाय्यक वनसंरक्षकांची नियुक्ती करण्यात आली आहे. त्यांनी अहवाल दिल्यानंतर पुढील कार्यवाही करण्यात येईल.