काश्मीर खोऱ्यात तैनात असलेल्या सीआरपीएफच्या दोन जवानांनी एका कॅन्सरग्रस्त महिलेला रक्तदान करण्यासाठी रमजानचे रोजे सोडले. जवानांनी केलेल्या या कामगिरीचं सर्व स्तरांतून कौतुक होत आहे.
सीआरपीएफच्या हेल्पलाइनवर काही दिवसांपूर्वी किश्तवाड येथील अनिल सिंह यांचा फोन आला होता. सिंह यांनी ल्युकेमियानं ग्रस्त असलेल्या बहिणीसाठी आवश्यक असलेले रक्त गोळा करण्याचे आवाहन केले होते. त्यानंतर चार जवान रक्तदानासाठी तयार झाले. त्यात उपनिरीक्षक संजय पासवान, कॉन्स्टेबल रामनिवास, मदस्सर रसूल भट आणि मोहम्मद असलम मीर यांचा समावेश आहे. भट आणि मीर यांचे रमजानचे रोजे होते. तरीही रक्तदानासाठी त्यांनी रोजे सोडले.
सीआरपीएफने गेल्या वर्षी जूनमध्ये काश्मीर खोऱ्यातील नागरिकांच्या मदतीसाठी ‘मददगार’ ही हेल्पलाइन सुरू केली होती. या हेल्पलाइनवर यापूर्वी अनेकांनी मदतीचे आवाहन केले आहे. दोनच आठवड्यांपूर्वी डोडा येथील आशिक हुसैन यांनी नवजात बालकाच्या शस्त्रक्रियेसाठी मदत मागितली होती. त्यानंतर सीआरपीएफने तात्काळ बालकाला रुग्णालयात दाखल केलं होतं.