धक्का लागल्याच्या कारणावरून रेल्वे प्लॅटफॉर्मवर झालेल्या वादावादीतून एका प्रवाशास रुळांवर ढकलण्यात आल्याने त्याचा लोकलखाली मृत्यू झाल्याची धक्कादायक घटना मुलुंड स्थानकात शनिवारी घडली. हा सर्व घटनाक्रम रेल्वे स्थानकातील सीसीटीव्हीमध्ये कैद झाला आहे. दीपक पटवा (५६) असे मृत्युमुखी पडलेल्या प्रवाशाचे नाव असून, त्यास रुळांवर फेकणाऱ्या दोघांचा कुर्ला रेल्वे पोलिसांनी शोध सुरू केला आहे.
मुलुंडमध्ये राहणाऱ्या पटवा यांचा व्यवसाय असून, ते शनिवारी दुपारी मुलुंड स्थानकात प्लॅटफॉर्म क्रमांक तीनवरून जात असताना त्यांचा एका महिला प्रवाशास चुकून धक्का लागला. त्याबद्दल त्यांनी माफीही मागितली. पण या महिलेने वाद सुरू करत त्यांना मारहाण केली. यावेळी अन्य एक सहप्रवासीही पुढे आला व या दोघांनी पटवा यांना जाब विचारत मारहाण सुरू केली. त्याचवेळी कल्याणच्या दिशेने जाणारी लोकल प्लॅटफॉर्म क्रमांक तीन येथे येत होती. तेव्हा दोघा आरोपींनी पटवा यांना रुळांवर ढकलून दिले. बेसावध असणाऱ्या पटवा यांचा तोल गेला आणि ते लोकलखाली सापडल्याने त्यांचा मृत्यू ओढवला. हा भयंकर प्रसंग पाहून घाबरलेल्या अन्य प्रवाशांनी रेल्वे पोलिसांना कळवले. लोकलच्या धडकेत पटवा यांचा मृत्यू झाल्याचे सीसीटीव्ही कॅमेऱ्यात कैद झाले आहे.
या अपघातानंतर स्थानकात एकच गोंधळ उडाला. अनेक जण आरडाओरडा करू लागले. त्यामुळे पकडले जाण्याच्या भीतीने पोलिस येण्यापूर्वीच दोघाही आरोपींनी स्थानकातून पलायन केले. पोलिस त्यांचा शोध घेत असल्याचे कुर्ला रेल्वे पोलिस ठाण्याचे वरिष्ठ पोलिस निरीक्षक महेश बळवंतराव यांनी सांगितले.