बिग बॉस’च्या घरात कधी काय होईल याचा नेम नाही. एरव्ही सर्वांवर तोंडसुख घेणारे अनिल थत्ते घरातील कॅमेऱ्यासमोर अचानक रडू लागले आणि सर्वांना आश्चर्याचा धक्का बसला.
विचित्र वेशभूषा असो किंवा खोचक बोलणे, अनिल थत्ते यांच्याकडे दुर्लक्ष करणे तसे कठीण आहे. घरातील इतर सदस्यांचे आणि थत्तेंचे सतत खटके उडत असतात. त्यांच्या फटकळ स्वभावामुळे त्यांना बऱ्याच जणांची बोलणीदेखील खावी लागतात. दुसऱ्या आठवड्यातील एलिमिनेशनमध्ये पुन्हा एकदा त्यांचे नाव आहे. या सगळ्या गोष्टींचा परिणाम होऊन अनिल थत्ते अचानक घरच्या आठवणींनी व्याकुळ झाले आणि त्यांच्या कुटुंबीयांशी इतक्या वर्षांत ते किती वाईट वागले हे त्यांना आठवले. ‘बिग बॉसच्या घरात मी इतर सदस्यांची जशी बोलणी खातो, शिव्या खातो तशीच वागणूक मी ४४ वर्षे रोज माझ्या बायकोला देत आलो. आमच्या ४४ वर्षांच्या संसारात मी कधीच जबाबदारीने वागलो नाही. पण ‘बिग बॉस’च्या घरात ७ दिवस राहिल्यावर मला हे कळून चुकलंय की माझ्या कुटुंबीयांवर फार अन्याय केलाय,’ असं म्हणत त्यांना अश्रू अनावर झाले. त्यांनी आपल्या कुटुंबीयांची जाहीर माफीदेखील मागितली.
‘बिग बॉस’च्या घरातील सदस्यांशी पहिल्या दिवसापासून वाद घालताना दिसणाऱ्या अनिल थत्तेंची ही वेगळीच बाजू प्रेक्षकांसमोर आली. परंतु, या सगळ्या प्रकरणानंतर थत्तेंना खरंच पश्चाताप झालाय की हा सगळा ‘मेलोड्रामा’ त्यांनी व्होट्स मिळवण्यासाठी केलाय असा प्रश्न ‘बिग बॉस’च्या चाहत्यांना पडलाय.