मुंबई पोलीस दलातील १,१३७ पोलीस शिपाईपदांच्या भरतीसाठी दोन लाखाहून अधिक अर्ज आले आहेत. म्हणजे या भरतीतील एका पदासाठी साधारण १७५ उमेदवार इच्छूक आहेत. विशेष म्हणजे केवळ इयत्ता आठवी पास असलेल्यांसाठी असलेल्या या नोकरभरतीत आठवी, दहावी, बारावी आणि पदवीधरच नव्हे तर डॉक्टर, वकील, एमबीए आणि इंजिनीयर पदवीधारकांनीही पोलीस शिपाईपदासाठी अर्ज केले आहेत. त्यामुळे आश्चर्य व्यक्त केले जात आहे.
पोलीस शिपाईपदाच्या भरतीसाठी शारीरिक चाचणी घेतली जात आहे. रोज सुमारे ९ हजार अर्जदारांना नायगांवचे हुतात्मा मैदान, गोरेगांव पोलीस मैदान आणि घाटकोपरला चाचणीसाठी बोलावण्यात येत आहे. ८ एप्रिलपासून ही भरती प्रक्रिया सुरू करण्यात आली असून ८ मे रोजी ही प्रक्रिया पूर्ण होणार असल्याचं सहपोलीस आयुक्त अर्चना त्यागी यांनी सांगितलं.
पोलीस शिपाईपदाच्या भरतीसाठी डॉक्टर आणि इंजिनीयर येत आहेत, ही आश्चर्याची बाब आहे. विशेष म्हणजे हे शिकलेले उमेदवार ग्रामीण भागांतून आलेले आहेत. त्यांची इंग्रजी बोलण्याची स्किल चांगली नाही. त्यामुळे त्यांना प्रायव्हेट सेक्टरमध्ये नोकरी मिळत नसल्याचं माजी पोलीस आयुक्त अरुप पटनायक यांनी सांगितलं.
‘पोलीस शिपाई झाल्यास राहण्यासाठी क्वॉर्टर मिळते. २५ हजार रुपये मासिक वेतन आणि इतर भत्ते मिळतात. तसेच विभागीय परीक्षांना बसून एटीएस, गुप्तचर विभाग आणि सायबर क्राइम सारख्या विभागात पाच वर्षांत प्रमोशन घेऊन जाऊ शकतात. त्यामुळे त्यांना कोणत्याही परिस्थितीत पोलीस दलात सामिल व्हायचं असतं, असंही त्यांनी सांगितलं.
पोलीस शिपाईपदाच्या भरतीसाठी ४२३ इंजिनीयर्स, १६७ एमबीए, ५४३ एम. कॉम, २८ बीएड पदवीधारक, ३४ एमसीए, २५ मास मीडिया अँड कम्युनिकेशन्स, ३ बीएएमएस. १६७ बीबीए आणि ३ एलएलबी पदवीधारकांनी अर्ज केले आहेत.