तंबाखू खाण्यासाठी आणि सिगारेट ओढण्यासाठी घरातून पैसे चोरणाऱ्या बारा वर्षांच्या मुलाला आईने आणि तिच्यासोबत राहणाऱ्या व्यक्तीने जबर मारहाण केल्याचा धक्कादायक प्रकार वारजे परिसरात घडला. या मारहाणीत मुलगा गंभीर जखमी झाला असून, त्याच्यावर खासगी रुग्णालयात उपचार सुरू आहेत. रुग्णालयाकडून पोलिसांना खबर आल्यानंतर हा प्रकार समोर आला आहे. या प्रकरणी मुलाची आई आणि आणखी एक व्यक्ती अशा दोघांवर वारजे माळवाडी पोलिस ठाण्यात गुन्हा दाखल करण्यात आला आहे.
अभिषेक संतोष वगारे (वय १२, रा. आपटे कॉलनी, वारजे) असे जखमी झालेल्या मुलाचे नाव आहे. या प्रकरणी त्याची आई अनिता संतोष वगारे (वय ३२) आणि गणेश वाळकु रेणुसे (वय ३७) यांच्यावर गुन्हा दाखल करण्यात आला आहे. याबाबत पोलिस नाईक अरुण किटे यांनी तक्रार दिली आहे. पोलिसांनी दिलेल्या माहितीनुसार, ‘अनिता या धुण्या-भांड्यांची कामे करतात. त्यांचे लग्न झाले असून, त्यांना अभिषेक हा बारा वर्षांचा मुलगा आहे. मात्र, अनिता आपल्या पतीसोबत राहत नाहीत. अभिषेकला तंबाखू आणि सिगारेटचे व्यसन होते. त्यामुळे तो घरातून पैसे चोरून व्यसन करत होता. या रागातून आई अनिता व गणेश रेणुसे या दोघांनी २४ फेब्रुवारी रोजी अभिषेकला रागाच्या भरात काठी आणि बेल्टने जबर मारहाण केली. या मारहाणीत अभिषेकच्या डोक्याला गंभीर जखम झाली आणि तो बेशुद्ध पडला. त्यानंतर त्याला एका खासगी रुग्णालयात दाखल करण्यात आले. त्याच्यावर उपचार सुरू आहेत. या घटनेत अभिषेक गंभीर जखमी असल्यामुळे रुग्णालयाकडून घटनेची माहिती वारजे माळवाडी पोलिसांना देण्यात आली. त्यानंतर पोलिसांनी रुग्णालयात जाऊन डॉक्टरांकडे विचारपूस केली.’
या घटनेबाबत पोलिसांनी अभिषेकची आई अनिता यांच्याकडेही चाकैशी केली. त्या वेळी त्यांनी व्यसनासाठी अभिषेकला काठीने व बेल्टने मारहाण केल्याचे आणि त्यामुळे तो गंभीर जखमी झाला असल्याचे पोलिसांना समजले. या प्रकरणी पोलिसांकडून आई व गणेश रेणुसेवर गुन्हा दाखल करण्यात आला आहे. मात्र, अद्याप कोणालाही अटक करण्यात आलेली नाही.