ठेवीदारांची फसपणूक केल्याच्या आरोपावरून अटकेत असलेले बांधकाम व्यवसायिक डी. एस. कुलकर्णी यांची आर्थिक गुन्हे शाखेच्या पोलिसांनी तब्बल पावणे तीनशे खाती गोठविली आहेत. या खात्याची माहिती घेतली असता त्यामध्ये फक्त केवळ ४३ कोटी ९ लाख रुपयांची रक्कम असल्याचे समोर आले आहे. त्यामुळे डीएसके यांनी पैसा कुठे ठेवला, याचा तपास पोलिस घेत आहेत.
शिवाजीनगर पोलिस ठाण्यात दाखल असलेल्या गुन्ह्यात डी. एस. कुलकर्णी आणि त्यांच्या पत्नी हेमंती यांना आर्थिक गुन्हे शाखेने अटक केली. या दोघांकडे पोलिस कोठडीत तपास केल्यानंतर त्यांची रवानगी न्यायालयीन कोठडीत करण्यात आली आहे. डी. एस. कुलकर्णी यांच्यावर गुन्हा दाखल झाल्यानंतर आर्थिक गुन्हे शाखेच्या पोलिसांनी त्यांची मालमत्ता आणि बँक खाते गोठविण्याची प्रक्रिया सुरू केली होती. त्यात डीएसकेंची हजारो कोटींची मालमत्ता ‘सील’ केली आहे. काही बँकांनी त्यांचे कर्ज थकविल्याने त्यांच्याकडे गहाण टाकलेल्या मालमत्तांचा लिलाव करण्याचे कामही सुरू केले आहे. परंतु, डी. एस. कुलकर्णी यांच्या बँक खात्यामध्ये किती पैसे आहेत, हे स्पष्ट होऊ शकलेले नव्हते.
आर्थिक गुन्हे शाखेने डी. एस. कुलकर्णी यांच्या विविध कंपन्यांच्या नावाने असलेली तब्बल २७६ बँक खाती गोठविली आहेत. त्यामध्ये केवळ ४३ कोटी ९ लाख रुपये पोलिसांना सापडले आहेत. डी. एस. कुलकर्णी यांनी नागरिकांकडून गुंवणुकीच्या स्वरूपात कोट्यवधी रुपये घेतले आहेत. आतापर्यंत पाच हजार पेक्षा जास्त तक्रारदारांची ३०० कोटींपेक्षा जास्तीची फसवणूक केल्याचे पोलिस तपासात समोर आले आहे. तसेच कर्जस्वरूपात डीएसकेंना पैसे दिले असलेल्या तक्रारादारांचीही संख्या दिवसोंदिवस वाढत आहे. पोलिस कोठडीत डीएसके यांनी व्यवस्थित माहिती दिलेली नाही. त्यामुळे त्यांनी पैसे कोठे वळविला याचा तपास सुरू आहे. त्यासाठी पोलिसांनी त्यांच्या घर व कार्यालयांवर छापे टाकून मिळालेली कागदपत्रे तपासण्याचे काम सुरू आहे.
याबाबत सहायक पोलिस आयुक्त नीलेश मोरे यांनी सांगितले, की डीएसके यांच्या कंपन्यांच्या २७६ बँक खात्यामध्ये केवळ ४३ कोटी ९ लाख रुपये असल्याचे समोर आले आहे. या प्रकरणी तपास सुरू आहे.