अभिनेत्री श्रीदेवी यांचे पार्थिव आज दुपारपर्यंत मुंबईत आणण्यात येणार आहे. दुबईतील काही कायदेशीर प्रक्रिया अद्याप पूर्ण न झाल्यामुळे त्यांचे पार्थिव कुटुंबीयांकडे देण्यात आले नसल्याची माहिती सूत्रांनी दिली.
उद्योगपती अनिल अंबानी यांच्या विमानाने दुबईतून मुंबईत आणले जाणार आहे, अशी माहिती विश्वसनीय सूत्रांकडून देण्यात आली आहे.
श्रीदेवी यांचे पार्थिव आणण्यासाठी रिलायन्स ट्रान्सपोर्ट अँड ट्रॅव्हल्सचे खासगी जेट विमान (एम्ब्रेअर-१३५ बीजे) रविवारी दुपारी दीड वाजताच्या सुमारास मुंबईतून दुबईसाठी रवाना झाल्याची माहिती सूत्रांनी दिली.
१३ आसनक्षमता असलेल्या या विमानातून श्रीदेवी यांचं पार्थिव घेऊन कुटुंबीय सोमवारी दुपारच्या सुमारास मुंबईत पोहोचतील, अशी शक्यता सूत्रांनी व्यक्त केली. श्रीदेवी यांच्या पार्थिवावर आजच सोमवारी मुंबईत अंत्यसंस्कार होणार असून याबाबत अधिकृत तपशील मात्र अद्याप देण्यात आलेला नाही.