वडिलांचं विव्हळणं कुणी ऐकू नये म्हणून त्याने आधी टीव्हीचा आवाज वाढवला. मग अतिशय क्रूरपणे वडील ज्या खोलीत झोपले होते, तिथे जाऊन त्यांच्या मानेवर वार केले आणि कुणालाही शंका येऊ नये म्हणून मग कापलेली मान फेविक्विकने चिकटविण्याचा मूर्खपणाही त्यानं केला. पण मान चिकटत नसल्याने घाबरलेल्या त्या निर्दयी मुलाने वडिलांना त्याच अवस्थेत सोडून घरातून पळ काढला. ही हृदयद्रावक घटना घडली आहे, उत्तर प्रदेशातील बस्ती जिल्ह्यात.
६५ वर्षीय रामदेव मिश्र रेल्वेतील सेवेतून निवृत्त झाले आहेत. काही वर्षांपूर्वी त्यांच्या पत्नीचे निधन झाले. मिश्र दरियापूर जंगल टोला येथील भैसहवा भागात मुलगा जगदीश आणि सून व दोन नातवंडांसोबत राहत होते. शनिवारी मिश्र घरातील त्यांच्या खोलीत झोपले असताना त्यांच्यासोबत हा प्रकार घडला. पोटच्या मुलानेच त्यांच्यावर निघृणपणे हल्ला केल्याच्या घटनेने परिसरात खळबळ उडाली आहे. याप्रकरणी सोनहा ठाणे पोलिसांनी आरोपी मुलाविरोधात गुन्हा दाखल केला आहे.
याविषयी पोलिसांनी सांगितले की, ” मिश्र झोपलेले असताना जगदीशने त्यांच्या मानेवर वार केले. नंतर त्यांची कापलेली मान तो फेविक्विकने जोडण्याचा प्रयत्न करू लागला. पण ते शक्य होत नसल्याचे लक्षात आल्याने घाबरून वडिलांना त्याच अवस्थेत सोडून, खोली बाहेरून बंद करून जगदीशने घरातून पळ काढला. मिश्रांच्या विव्हळण्याचा आवाज शेजाऱ्यांना आला तेव्हा त्यांनी रक्तांच्या थारोळ्यात पडलेल्या मिश्रांना त्वरीत हॉस्पिटलमध्ये नेले व आम्हाला घटनेची माहिती दिली.”
सध्या मिश्र यांच्यावर उपचार सुरू आहेत, तर आरोपी जगदीश फरार आहे. जगदीश बेरोजगार असून २००५ साली त्याने त्याच्या पहिल्या पत्नीची गच्चीवरून धक्का देऊन हत्या केली होती. त्यासाठी त्याला तुरुंगवासाची शिक्षाही झाली. मात्र तुरुंगातून सुटून आल्यानंतर त्याने दुसरे लग्न केले आणि त्याला दोन मुलंही झाली.