‘नागपूर येथे ब्रेनडेड घोषित केलेल्या मुंबईतील रुग्णाला शहरातील एमजीएम रुग्णालयात यकृत प्रत्यारोपण करण्यात आले. यकृत प्रत्यारोपण करण्याची ही मराठवाड्यातील दुसरी घटना आहे़ तीन महिन्यांच्या कालावधीनंतर दुसऱ्यांदा एमजीएममध्ये यकृत प्रत्यारोपण करण्यात येत आहे,’ अशी माहिती रुग्णालयाचे उपअधिष्ठाता डॉ. प्रवीण सूर्यवंशी यांनी शनिवारी पत्रकारांना दिली.
डॉ. सूर्यवंशी म्हणाले, ‘नागपूर येथील ५२ वर्षीय रुग्णांच्या मेंदूत रक्तस्त्राव झाल्यानंतर डॉक्टरांनी त्यास शुक्रवारी ब्रेनडेड घोषित केले़ त्यांच्या नातेवाईकांनी अवयवदानाची इच्छा व्यक्त केली़ त्यानंतर प्रत्यारोपण समितीने रुग्णाची चाचणी व गरजूंची यादी तपासून मूत्रपिंड (किडनी) नागपूर येथील रूग्णासाठी, हृदय चेन्नईतील फोर्टिस हॉस्पिटल तर यकृत एमजीएम रूग्णालयात पाठविण्याचा निर्णय घेण्यात आला. मुंबईतील ६९ वर्षीय रुग्णाला यकृताची गरज होती़ प्रत्यारोपणासंदर्भातील संपूर्ण चाचण्या पूर्ण झाल्यानंतर या रुग्णावर यकृत प्रत्यारोपणाचा निर्णय घेण्यात आला़ ग्लोबल हॉस्पिटल, मुंबई येथील डॉक्टरांच्या टिमने नागपूर येथून चॉर्टर विमानाने औरंगाबादेत शनिवारी सायंकाळी सहाच्या सुमारास यकृत आणले़ विमानतळापासून हॉस्पिटलपर्यंत ग्रीन कॉरिडॉर लावण्यात आले.’
नागपूरहून औरंगाबादेत यकृत येण्यापूर्वी डॉ़ प्रवीण सूर्यवंशी व त्यांच्या टिमने मुंबईतील रुग्णाचे यकृत काढले होते़ यकृत येताच डॉ़ सूर्यवंशी यांच्यासह डॉ़ रवी मोहका, डॉ़ प्रशांत राव, डॉ़ नारायण सानप, डॉ़ अमोल, डॉ़ नागेश जंबुरे यांनी प्रत्यारोपणासाठी सहकार्य केले. रात्री उशिरापर्यंत प्रत्यारोपण सुरूच होते़ मुंबईत चार्टर फ्लाइट वेळेवर मिळाले नाही, त्यामुळे दिल्लीहून चार्टर फ्लाइट मागविण्यात आले. त्यामुळे आठ लाखांचा खर्च अधिक आला आणि प्रत्यारोपणासाठी पाच तास विलंब झाला.