उल्हासनगरजवळील शहाड परिसरातील सेंच्युरी रेयॉन कंपनीत गुरुवारी रात्री विषारी वायू गळती झाली. यात गुदमरून दोन कामगाराचा जागीच मृत्यू झाला. इतर ११ कामगारांनाही बाधा झाल्यानं त्यांना कल्याणच्या खासगी रुग्णालयात दाखल करण्यात आलं आहे.
कंपनीत रात्री नऊच्या सुमारास गॅस पाइपलाइनचं दुरुस्तीचं काम सुरु होतं. त्यावेळी वायू गळती झाली. यात गुदमरून दोन कामगाराचा मृत्यू झाला. इतर ११ कामगारांनाही वायू गळतीमुळं बाधा झाली. त्यांना तातडीनं कल्याण येथील रुग्णालयात दाखल करण्यात आलं आहे. त्यांच्यावर उपचार सुरू आहेत. घटनेची माहिती मिळताच गॅस गळती नियंत्रणात आणणारं पथक आणि अग्निशमन दलाचे जवान कंपनीत पोहोचले. त्यांनी वायू गळती रोखली. दरम्यान, कंपनीत गॅस गळती झाल्यानंतर कामगारांच्या सुरक्षेसाठी कोणत्याही प्रकारची सुविधा नसल्यानं ही घटना घडल्याचा आरोप कामगारांसह नातेवाइकांनी केला आहे.