शिक्षिकेने आईकडे तक्रार केल्याच्या किरकोळ कारणावरून विद्यार्थ्याने शिक्षिकेच्या डोक्यात प्रेशर कुकर मारून तसेच चाकूने वार केल्याची धक्कादायक घटना डोंबिवलीत घडली. खासगी शिकवणी घेणाऱ्या ६५ वर्षीय शिक्षिका मनिषा खानोलकर यांचा त्यात मृत्यू झाला. याप्रकरणी अल्पवयीन आरोपीचा शोध घेऊन त्याला पोलिसांनी अटक केली आहे. हा प्रकार शनिवार ते रविवार सकाळदरम्यान घडला असावा, अशी शक्यता पोलिसांनी वर्तवली आहे. कोपर येथील परशुराम सोसायटीत हा प्रकार घडला. मृत शिक्षिका घरात एकट्याच राहत होत्या.
सुमारे आठ दिवसांपूर्वी मनिषा खानोलकर यांनी या विद्यार्थ्याच्या आईकडे त्याच्याबाबत तक्रार केली होती. त्याचा राग या विद्यार्थ्याच्या मनात होता. या विद्यार्थ्याला अटक करण्यात आली असून त्याला ८ फेबुवारीपर्यंत पोलिस कोठडीत ठेवण्याचा आदेश कल्याण न्यायालयाने दिल्याची माहिती पोलिसांनी दिली.