विलेपार्ले येथे व्हिडीओ क्लिप्सचा धाक दाखवून १५ वर्षीय मुलीवर नऊ जणांनी बलात्कार केल्याप्रकरणी पोलिसांनी सोमवारी आणखी दोन फरार आरोपींना अटक केली. विलेपार्ले पोलिसांनी यापूर्वी नऊपैकी सहा जणांना अटक केली होती. या सर्व आरोपींविरोधात पोक्सो अंतर्गत गुन्हा दाखल झाला आहे.
विलेपार्ले परिसरात राहणाऱ्या मुलीने बलात्काराची तक्रार नोंदवल्यानंतर पोलिसांनी नऊ आरोपींविरोधात गुन्हा दाखल केला. त्यापैकी सहा जणांना अटक करून न्यायालयात हजर केले असता या सर्वांना १२ फेब्रुवारीपर्यंत पोलिस कोठडी सुनावली आहे. पोलिसांनी फरार झालेल्या तीन आरोपींचा तपास सुरू करून त्यातील दोघांना अटक केली आहे. अद्याप एक आरोपी फरार असून त्याचाही शोध घेण्यात येत आहे.
क्लिप सापडली
या प्रकरणातील व्हिडीओ क्लिप पोलिसांना सापडली आहे. त्यामुळे आरोपीच्या विरोधात भक्कम पुरावे तयार होण्यास मदत होणार आहे.
राष्ट्रवादी काँग्रेसचा मोर्चा
राष्ट्रवादी काँग्रेसने या घटनेच्या निषेधार्थ सोमवारी विलेपार्ले पोलिस ठाण्यावर हंटर मोर्चा काढला. त्याचे नेतृत्व राष्ट्रवादी काँग्रेसच्या नेत्या विद्या चव्हाण, महिला अध्यक्षा सुरेखा पेडणेकर यांनी केले. बलात्कारी आरोपींना ताब्यात देण्याची मागणी मोर्चात करण्यात आली.