रेयसीचे साक्षगंध झाल्याने एका युवकाने तिच्यावर हल्ला करीत स्वतःचा गळा चिरून आत्महत्येचा प्रयत्न केला. दिवसाढवळ्या टेलिफोननगरमधील भर चौकात ही थरारक घटना घडली. या घटनेमुळे नागरिकांमध्ये काही काळ दहशतीचे वातावरण होते. संदीप वासनिक (२२, रा. कैलासनगर) असे जखमी युवकाचे नाव आहे.
पोलिसांनी दिलेल्या माहितीनुसार, संदीप हा एलआयटी कॉलेजमध्ये बीटेकच्या प्रथम वर्षाला शिकतो. या २४ वर्षीय तरुणीचे डीफार्म झाले असून, ती एका फार्मसीमध्ये काम करते. दोघेही एकाच गावाचे असल्याने त्यांची ओळख होती. संदीप हा तिच्यावर एकतर्फी प्रेम करतो. आठवडाभरापूर्वी तरुणीचे अन्य एका युवकासोबत साक्षगंध झाले. तेव्हापासून संदीप हा तणावात होता. मंगळवारी रात्री संदीप हा दिघोरी येथे राहणाऱ्या रजत नावाच्या मित्राच्या घरी आला व तेथे झोपला. सकाळी ११ वाजता तो टेलिफोननगर चौकात आला. येथे त्याने तरुणीला गाठले. ‘तू लग्न मोड, मी तुझ्यावर खूप प्रेम करतो. तुझ्याशिवाय जगू शकत नाही’, असे तो तरुणीला म्हणाला. ‘माझे साक्षगंध झाले आहे. तू समजून घे. मी नातेवाइकांना निराश करू शकत नाही’, असे युवती त्याला म्हणाली. ‘मैं तुम्हे भूल जाऊ ये हो नही सकता, और तुम मुझे भूल जाओ ये मैं होने नही दूँगा’, असे पुटपुटत संदीपने स्वतःवर ब्लेडने वार करायला सुरुवात केली. तरुणीने त्याला अडविण्याचा प्रयत्न केला असता त्याने तरुणीच्या हातावरही वार करायला सुरुवात केली. तेथे नागरिकांनी धाव घेतली व तरुणीला सोडविले. संदीप तेथून पळाला. काही अंतरावर जाऊन त्याने स्वतःच्या गळ्यावर ब्लेडने वार करायला सुरुवात केली. परत नागरिक धावले. तोपर्यंत पोलिसांचा ताफा तेथे पोहोचला. पोलिसांनी त्याला पकडून थेट मेडिकलमध्ये दाखल केले. उशिरा रात्रीपर्यंत नंदनवन पोलिसांनी गुन्हा दाखल केला नव्हता.
नगरसेवक झलके धावले मदतीला
पोलिसांनी संदीपला मेडिकलमध्ये दाखल केले. मात्र, रक्ताच्या थारोळ्यात तरुणी तेथेच उभी होती. याची माहिती मिळताच नगरसेवक पिंटू झलके हे तिच्या मदतीला धावले. तिला जवळीलच खासगी हॉस्पिटलमध्ये उपचारासाठी दाखल केले. उपचारानंतर झलके तिला व तिच्या नातेवाइकांना घेऊन नंदनवन पोलिस स्टेशनमध्ये पोहोचले व तक्रार दिली.