इतर वेळी तंत्रज्ञानातील कौशल्ये, नवनवीन संशोधन, स्टार्ट अप अशा गोष्टींमुळे चर्चेत असलेले आयआयटी मुंबई मंगळवारी शाकाहारी-मांसाहारी वादावरून चर्चावलयात आले आहे. येथील वसतिगृहामधील मांसाहार घेणाऱ्या विद्यार्थ्यांनी खानावळीतील स्टीलचे ताट वापरू नये, त्याऐवजी मांसाहारी जेवणासोबत मिळणाऱ्या प्लास्टिक प्लेट्सचा वापर करावा, असा वादग्रस्त ई-मेल विद्यार्थ्यांना पाठवण्यात आला आहे. मात्र, हा ई-मेल आयआयटी प्रशासनाने नव्हे तर स्टुडंट कौन्सिलने पाठवल्याचे संस्थेचे म्हणणे आहे.
आयआयटीमध्ये प्रवेश घेणाऱ्या विद्यार्थ्यांकडून खानावळीचे शुल्कही घेतले जाते, मात्र यात केवळ शाकाहारी जेवणाची सोय असते. मांसाहारी जेवण हवे असल्यास त्यांना अतिरक्त पैसे मोजावे लागतात. हे मांसाहारी जेवण प्लास्टिक ट्रे प्लेटमध्ये दिले जाते. यासंदर्भात वसतिगृह क्रमांक ११मधील स्टुंडट कौन्सिलने विद्यार्थ्यांना एक ई-मेल पाठवला आहे. यात मांसाहारी जेवण घेणारे विद्यार्थी शाकाहारी विद्यार्थ्यांना दिल्या जाणाऱ्या नियमित स्टीलच्या ताटाचा वापर करत असल्याच्या तक्रारी येत आहेत. त्यामुळे मांसाहारी जेवण घेणाऱ्यांनी प्लास्टिकच्याच ट्रेचा वापर करावा, असे नमूद करण्यात आले आहे.
वसतिगृह क्रमांक ११मधील विद्यार्थ्यांनाच हा ई-मेल पाठवण्यात आला असून, यामुळे विद्यार्थ्यांमध्ये नाराजी पसरली आहे. मांसाहारी जेवण ज्या प्लास्टिक प्लेटमध्ये दिले जाते ती स्टीलच्या ताटापेक्षा आकाराने लहान असते, असे या विद्यार्थ्यांचे म्हणणे आहे. ‘देशातील काही महाविद्यालयांमध्ये भोजनकक्षात मांसाहारी आणि शाकाहारी विद्यार्थ्यांसाठी स्वतंत्र आसनव्यवस्था असल्याचे मी ऐकून आहे. पण आयआयटीसारख्या ठिकाणी असा दुजाभाव केला जातो हे दुर्दैवी आहे’ अशी प्रतिक्रिया एका विद्यार्थ्याने दिली, तर हा ई-मेल प्रशासनाने पाठवला नसून स्टुंडट कौन्सिलने पाठवला आहे. पण जोपर्यंत विद्यार्थी आवाज उठवत नाहीत, तोपर्यंत प्रशासन काहीच करणार नाही, असेही विद्यार्थ्यांनी सांगितले.
मांसाहार करणाऱ्यांनी शाकाहारी विद्यार्थ्यांना दिल्या जाणाऱ्या नियमित प्लेटचा वापर केल्याचे समोर आले आहे. त्यामुळे काही विद्यार्थ्यांच्या धार्मिक भावना दुखावल्या असून, त्यामुळेच नियमांची आठवण करून देण्यासाठी हा ई-मेल पाठवण्यात आला आहे.