दुसऱ्यासाठी खड्डा खोदणारा स्वत:च खड्ड्यात पडतो, असं म्हटलं जातं. अशीच एक घटना पंजाबमधील फिरोजपूरमध्ये घडलीय. पत्नीला पाण्यात बुडवून जीवे मारण्याचा कट रचणाऱ्या पतीलाच जीव गमावावा लागला आहे. त्याने पत्नीला कालव्यातील पाण्याच्या प्रवाहात ढकलले. मात्र, त्या प्रवाहात स्वतःच वाहून गेला.
पोलिसांच्या माहितीनुसार, अन्वर मसीह (वय २९) हा पत्नी कोमलला (वय २६) बुधवारी संध्याकाळी कालव्याच्या ठिकाणी फिरायला घेऊन गेला. अन्वरचा भाऊ नछत्तरीसही त्याच्यासोबत होता. कोमलला पाण्यात बुडवून मारायचा दोघांचा कट होता. कालव्याच्या ठिकाणी गेल्यानंतर त्यांनी कोमलला पाण्यात ढकललं. त्यावेळी तिनं स्वतःला वाचवण्याचा प्रयत्न केला. काठावरून ती बाहेर पडण्याचा प्रयत्न करत होती. तिला पुन्हा ढकलण्यासाठी अन्वर पाण्यात उतरला. ती कशीबशी पाण्याबाहेर पडली आणि स्वतःचा जीव वाचवला. मात्र, त्याचवेळी पाण्याचा प्रवाह वाढला आणि त्यात अन्वर वाहून गेला. त्याचा अद्याप शोध लागला नाही. तर त्याचा भाऊ घटनास्थळावरून पसार झाला आहे. या प्रकरणी कोमलनं पोलीस ठाण्यात तक्रार दाखल केली आहे. पोलीस या प्रकरणाची चौकशी करत आहेत.