दुरगाव येथे पारधी समाजाच्या एका व्यक्तीने सहा वर्षांची मुलगी पळवून आणली होती. गावामध्ये ही मुलगी ग्रामस्थांना दिसली तेव्हा ती मुलगी हिंदी बोलत असून, ती पारधी समाजाची नसल्याचे लक्षात आल्यावर उपसरंपच पप्पू शेख, अब्बास शेख, बाबा शेख, नबीब शेख यांच्यासह ग्रामस्थ त्या पारध्याच्या घरी गेले. त्यांनी त्या मुलीची सुटका करून तिला पोलिस निरीक्षक वसंत भोये यांच्या ताब्यात दिले. यासाठी सरंपच अशोक जायभाय यांनी पुढाकार घेतला होता.
पोलिस निरीक्षक भोये यांनी सांगितले की, ग्रामस्थांनी पोलिसांकडे दिलेली मुलगी आपले नाव झरीना असे सांगते. यावरून ती एक तर मुस्लीम समाजाची असावी, असा अंदाज असून तिला पूर्ण नाव सांगता येत नसून ती केवळ गावाचे नाव मुंबई असे सांगते. तिला जादा माहिती सांगता येत नाही. या मुलीस या पारध्यांनी पळवून आणले असावे, अशी शक्यता पोलिसांनी व्यक्त केली आहे. या संदर्भात आम्ही घटनास्थळी जाऊन चाैकशी केली व तेथे असलेल्या त्या घरातील एका वृद्ध महिलेस ताब्यात घेतले आहे. ही मुलगी माझी नाही तर सतीश चंदर काळे याच्या बायकोने ही मुलगी पळवून आणली आहे, अशी माहिती या वृद्ध महिलेने पोलिसांना दिली. या प्रकरणी राज्यात कोठे लहान मुलगी मीसिंग आहे का, हे आम्ही तपासत आहोत, तसे सर्व पोलिस स्टेशनला तिचे छायाचित्र व माहिती पाठवली असून सोशल मीडियावरही सर्व माहिती पोस्ट केली आहे, असे भोये यांनी सांगितले.