एकीकडे उपनगरीय लोकलचा विद्युतप्रवाह डीसीतून एसीमध्ये रूपांतरित झाल्याने मध्य रेल्वेचा वेग वाढला असतानाच, रविवारी रेल्वे सुरक्षा आयुक्तांनी मेट्रोचा वेग वाढवण्यास हरकत नाही, असा निर्वाळा दिला. सध्या मेट्रो ताशी ५० किमीने धावत असून तिचा वेग ८० किमी प्रति तासापर्यंत वाढवण्यास यामुळे मोकळा ट्रॅक मिळाला आहे.मुंबई मेट्रोची रविवारी सुरक्षा चाचणी घेण्यात आली. रेल्वे सुरक्षा आयुक्तांच्या देखरेखीखाली ही चाचणी घेण्यात आली. त्यासाठी सकाळी साडेआठ वाजल्यापासून सायंकाळी चारपर्यंत मेट्रोसेवा पूर्णपणे बंद ठेवण्यात आली होती. या चाचण्यांदरम्यान मेट्रोचा वेग वाढवता येऊ शकतो का, याची चाचणी करण्यात आली. सध्या मेट्रोचा वेग हा ताशी ५० किमी इतका आहे. तो वाढवता येऊ शकतो का यासाठी कमिशनर ऑफ मेट्रो रेल सेफ्टी रविवारी उपस्थित होते. या चाचण्यांनंतर मेट्रोचा वेग वाढवण्यास हरकत नाही, असा निर्वाळा देण्यात आला. मेट्रोचा वेग प्रति तास ८० किमीपर्यंत नेण्यास मंजुरी देण्यात आली. दरम्यान, दुपारी सव्वातीन ते पावणेचारच्या दरम्यान चकाला आणि वेस्टर्न एक्स्प्रेस हायवे या स्थानकांवर अग्निसुरक्षेची चाचणीही घेण्यात आली.
मेट्रो दिवसभर बंद राहणार ही माहिती बहुतांशी मुंबईकरांपर्यंत पोहोचवण्यात आली नव्हती. तसेच मेट्रो स्टेशनांवरही त्याविषयीचे कुठलेही फलक लावण्यात आले नव्हते. त्यामुळे प्रवाशांना स्टेशनवर पोहोचल्यानंतर परत फिरावे लागले. सायंकाळी चारनंतर मेट्रो नियमितपणे धावू लागली.
लोकल रेल्वे टर्मिनसमध्ये शिरताना लोकलना आपसूक ब्रेक लावणारी ‘ऑक्झिलरी वॉर्निंग सिस्टीम’ (एडब्ल्यूएस) सोमवारी चर्चगेट येथे बसवण्यात येणार आहे. रविवार २८ जूनला चर्चगेट स्टेशनवर एका लोकलने बफरला धडक दिली होती. त्यानंतर रेल्वेने प्रत्येक टर्मिनसला ही यंत्रणा बसवण्याचा निर्णय घेतला होता. चर्चगेट अपघाताची पुनरावृत्ती होऊ नये यासाठी ‘एडब्ल्यूएस’ यंत्रणा सुरू करण्याचा निर्णय घेण्यात आला आहे. चर्चगेटसह मुंबई सेंट्रल, दादर आणि अंधेरी या स्टेशनवर ही यंत्रणा लागणार आहे.