वसईत शॉर्टकटच्या नादात रेल्वेरूळ ओलांडल्याने एका विद्यार्थ्याला प्राण गमवावा लागला आहे. पादचारी पुलावरून येण्याऐवजी वडिलांनी मालगाडीखालून ट्रॅक ओलांडून यायला सांगितल्याने ट्रॅक ओलांडताना हा मुलगा मालगाडीखाली चिरडला गेल्याने त्याचा मृत्यू झाला. या अनपेक्षित आणि धक्कादायक घटनेमुळे वसईत हळहळ व्यक्त केली जात आहे.
ऑस्टिन शाजू असे या विद्यार्थ्याचे नाव आहे. त्याने नुकतीच इयत्ता दहावीची परीक्षा दिली आहे. विरारमध्ये सुट्टी घालविल्यानंतर शाजू कुटुंब केरळात जाण्यासाठी निघाले होते. त्यावेळी ही दुर्देवी घटना घडली. ऑस्टिन हा त्याचे वडील अँथोनी शाजू आणि आई व बहिणीबरोबर विरारवरून वसईला आले होते. वसई स्टेशनच्या प्लॅटफॉर्म क्रमांक ५ वर उतरल्या नंतर अँथोनी यांनी पत्नी आणि मुलीला पादचारी पुलावरून प्लॅटफॉर्म क्रमांक सातवर यायला सांगितलं. त्यानंतर जड सामान जवळ असल्यानं दोघा बापलेकांनी ट्रॅक ओलांडून प्लॅटफॉर्म क्रमांक ७ वर जाण्याचं ठरवलं. जड बॅगांसह बापलेक रेल्वे ट्रॅकवर उतरले. त्याचवेळी पाच आणि सहा क्रमांकाच्या प्लॅटफॉर्म दरम्यान मालगाडी थांबली होती. मालगाडी बराच वेळ थांबेल असा अंदाज बांधून दोघांनीही मालगाडीखालून जाण्याचं ठरवलं.
त्यानंतर अँथोनीने ऑस्टिनला मालगाडीखाली बसायला सांगत त्याच्याकडे सामान पास करायला सुरुवात केली. इतक्यात मालगाडी सुरु झाली. पण ऑस्टिनला त्याची कल्पना न आल्याने तो चाकाखाली चिरडला गेला. अँथोनी यांनी ऑस्टिनला बाहेर काढण्याचा आटोकाट प्रयत्न केला. पण त्यांना त्यात यश आले नाही. ऑस्टिनला बाहेर खेचण्याच्या प्रयत्नात त्यांच्या डोक्याला मार लागून गंभीर दुखापत झाली. स्टेशनवरच्या प्रवाशांनी हा प्रकार पाहून जोरजोरात आरडाओरड करायला सुरूवात केली. त्यामुळे मालगाडी थांबवण्यात आली आणि ऑस्टिनचा मृतदेह बाहेर काढण्यात आला. वर्षभरापूर्वीच अँथोनी यांची बदली विरार ब्रँचला झाली होती. त्यांचं कुटुंब पहिल्यांदाच मुंबईला आलं होतं.