उत्तर प्रदेशात अत्यंत घृणास्पद घटना घडली आहे. बुलंदशहरातील यमुना एक्सप्रेसवेवर एका टोळक्याने एका कुटुंबाचे रात्रभर ओलीस ठेऊन त्यांच्याकडील पैसा आणि दागिने लुटले. त्यानंतर त्याच कुटुंबातील चार महिलांवर सामूहिक बलात्कार करून या कुटुंबातील प्रमुखाची गोळ्या घालून हत्या केल्याची धक्कादायक घटना घडली आहे. या घटनेमुळे उत्तर प्रदेशात खळबळ उडाली असून राज्यातील कायदा आणि सुव्यवस्थेवर प्रश्नचिन्हे निर्माण झाली आहेत.
रामनेर जवळच्या सबौता गावात काल रात्री ही घटना घडली. यमुना एक्सप्रेसवेवर रात्री सुमारे १२ जणांच्या एका टोळीने आमच्या कारला घेरले. या टोळक्याच्या हातात शस्त्रे होती. त्यांनी आधी गोळी झाडून आमच्या कारचा टायर पंक्चर केला. हा प्रकार पाहून आमच्या कुटुंब प्रमुखाने या टोळक्याला जोरदार विरोध केला. त्यामुळे या टोळक्याने त्यांच्यावर तीन गोळ्या झाडल्याने त्यांचा जागीच मृत्यू झाला, असे या पिडीत महिलेने सांगितले. मृत व्यक्तिच्या बहिणीची डिलिव्हरी होणार होती. तिला पाहण्यासाठी ते कारने निघाले असता ही घटना घडली.
कुटुंबप्रमुखाची हत्या केल्यानंतर या टोळक्याने शस्त्रांचा धाक दाखवून चारही जणींवर बलात्कार केला. त्यात पिडीत महिलेच्या एका १३ वर्षाच्या मुलीचा समावेश आहे. त्यानंतर या महिलांकडील दागिने आणि ४५ हजाराची रोकड घेऊन हे बदमाश फरार झाले. कमीत कमी १० जणांच्या टोळक्यांनी हा प्रकार केला असावा असा अंदाज पोलीस व्यक्त करत आहेत. याप्रकरणी गुन्हा नोंदविण्यात आला असून अधिक तपास सुरू असल्याचं पोलिसांनी सांगितलं