गोरेगाव चेकनाका येथे भाजीविक्रीच्या नावाखाली अंमली पदार्थ विकणाऱ्या तरुणाला अंमली पदार्थविरोधी पथकाने (एएनसी) अटक केली आहे. सूरज गुप्ता (२५) असे या आरोपीचे नाव आहे. अनेक दिवसांपासून तो पोलिसांच्या रडारवर होता.
खारच्या साईबाबा रोडवरील कालूसिंग चाळीत राहणारा सूरज गोरेगाव चेक नाका, आरे जिम अॅक्टिविटी सेंटर येथे भाजीविक्रीचा व्यवसाय करीत होता. काही दिवसांपूर्वी कांदिवलीच्या एएनसी पोलिसांनी कांदिवली परिसरातून अल्पवयीन मुलांना अंमली पदार्थाचे व्यसन करताना ताब्यात घेतले होते. त्यावेळी एका मित्रामार्फत भाजीविक्रेत्याकडून हे अंमली पदार्थ मिळाले एवढीच माहिती पोलिसांना या मुलांच्या चौकशीतून प्राप्त झाली. गोरेगाव परिसरात या भाजीवाल्याची ओळख पटवणे पोलिसांना अवघड होते. पोलिसांनी विविध परिसरातील भाजीविक्रेत्यांवर लक्ष ठेवले होते.
भाजी खरेदीसाठी शक्यतो महिला खरेदीसाठी जातात. मात्र गोरेगाव चेक नाक्याजवळील भाजीविक्री करणाऱ्या सूरजजवळ मुले मोठ्या प्रमाणात जात असल्याची माहिती पोलिस उपायुक्त शिवदीप लांडे यांना मिळाली. त्यानुसार पोलिसांनी सूरजच्या संशयास्पद हालचालींवर लक्ष केंद्रीत केले. पोलिसांनी एका तरुणाच्या मदतीने सापळा रचला. त्यावेळी भाजीविक्रीच्या आड सूरज अंमली पदार्थाची तस्करी करत असल्याचे उघड झाले. कांदिवलीच्या एएनसी पोलिसांनी सूरजकडून तब्बल ७ लाख ४० हजार रुपयांचे ३७० ग्रॅम ‘एमडी’ आणि आठ लाख रुपये रोख रक्कम हस्तगत केली. अंमली पदार्थाची तस्करी करून दिवसाला ७ लाख रुपये कमवत असल्याची कबुली सूरजने पोलिसांना दिली. मात्र यातील मुख्य सूत्रधार अद्याप हाती लागला नाही.