मध्य फिलिपीन्समध्ये आज सकाळी ओरमॉक बंदरावरून १७३ प्रवाशांना घेऊन जाणाऱ्या प्रवासी जहाजाला जलसमाधी मिळाली. या दुर्घटनेत ३६ जणांचा मृत्यू झाला आहे. तर १९ जण अजूनही बेपत्ता आहेत. तटरक्षक दल आणि आपत्कालीन विभागाच्या पथकाचे बचावकार्य युद्धपातळीवर सुरू आहे.
ओरमॉक बंदरापासून एक किलोमीटरवर खबळलेल्या समुद्रात हे जहाज बुडाले. या दुर्घटनेची माहिती मिळताच तटरक्षक दलाच्या जवानांनी आणि आपत्कालीन विभागाच्या अधिकाऱ्यांनी बचावकार्य सुरू केले. ७ जहाज बचावकार्यासाठी पाठवण्यात आले. वेगाने मदतकार्य सुरू केल्यामुळे १०० हून अधिक प्रवाशांना वाचवण्यात यश आले आहे. तर ३६ जणांचा मृत्यू झाला, अशी माहिती तटरक्षक दलाच्या अधिकाऱ्यांनी दिली. बुडालेल्या जहाजातून बचावलेल्या प्रवाशांना तत्काळ ओरमॉक शहरातील रुग्णालयांत उपचारासाठी दाखल करण्यात आले आहे, अशी माहिती आपत्कालीन विभागाच्या अधिकाऱ्यांनी दिली आहे. दरम्यान, वादळी वाऱ्यांमुळे समुद्र खवळला होता. मोठमोठ्या लाटा उसळल्याने हे प्रवासी जहाज बुडाले, अशी माहिती फिलिपीन्स नॅशनल रेड क्रॉसचे चेअरमन रिचर्ड गॉर्डन यांनी दिली.