नवी दिल्लीच्या गुरगाव शहरात एक अजबच प्रकार घडला आहे. काही तरुणांनी एका कुत्र्याला किडनॅप केले आणि नंतर हा कुत्रा शिजवून खाल्ल्याची धक्कादायक घटना घडली आहे. या प्रकरणी संबंधित तरुणांविरोधात गुन्हा दाखल करण्यात आला आहे.
गुरगावच्या डीएलएफ फेज-टू येथे राहणाऱ्या एका महिलेचा ब्राऊनी नावाचा कुत्रा २३ एप्रिल रोजी चोरीला गेला होता. कुत्रा चोरीला गेल्याने तो सापडावा म्हणून या महिलेने गुडगावमध्ये कुत्रा हरवल्याचे पोस्टरही लावले होते. शिवाय हा कुत्रा शोधून देणाऱ्यास ५ हजार रुपयांचे बक्षिस देण्याची घोषणाही त्यांनी केली होती. या महिलेकडे आणखीही अनेक प्रजातीचे श्वान आहेत. पण हा कुत्रा देशी प्रजातीचा होता. हे पोस्टर पाहून दोन लोकांनी नंतर या महिलेशी संपर्क साधला. काही तरुणांनी या कुत्र्याचे तोंड आणि हात बांधून त्याला किडनॅप केले आणि नंतर कुत्र्याला मारून टाकल्याचं या महिलेला सांगितलं, अशी माहिती ‘पीपल फॉर अॅनिमल्स’चे गुरगाव अध्यक्ष अमित चौधरी यांनी दिली.
गुरगावच्या सिकंदरपूरमधील कम्युनिटी सेंटरजवळ काही तरुणांनी हा कुत्रा शिजवून खाल्ल्याचं सांगितलं जातयं. या प्रकरणी पोलिसांनी फिलिप्स नावाच्या युवकाला अटक केली आहे. या गावाजवळच एका ठिकाणी कुत्र्याच्या मांस विक्रीचं दुकानही आहे.
आरोपींचा एक व्हिडिओही या संस्थेला मिळाला असून त्यात आरोपी कुत्रा शिजवून खाण्याविषयी चर्चा करत असल्याचं दिसून आलं आहे. त्याशिवाय या आरोपींचे फोटोही संस्थेकडे असून हा सर्व पुरावा पोलिसांना देण्यात आल्याचं चौधरी यांनी सांगितलं. या प्रकरणी अधिक तपास सुरू असल्याचं पोलीस अधिकारी सुदीप कुमार यांनी सांगितलं.