फ्रान्समधील राष्ट्राध्यक्षपदाची निवडणूक काही दिवसांवर आली असताना, पॅरिसमध्ये गुरुवारी रात्री दहशतवादी हल्ला झाला. दोन दहशतवाद्यांनी पोलिसांच्या कारवर अंदाधुंद गोळीबार केला. त्यात एका अधिकाऱ्याचा मृत्यू झाला असून दोन जण गंभीर जखमी आहेत. पोलिसांनी एका दहशतवाद्याला ठार केलं असून एकाचा शोध सुरू आहे. या हल्ल्याची जबाबदारी इस्लामिक स्टेटनं स्वीकारली आहे.
गेल्या दोन वर्षांपासून पॅरिस सातत्यानं दहशतवाद्यांचं लक्ष्य ठरतंय. २०१५मध्ये झालेल्या हल्ल्यापासून ते दहशतीच्या छायेखालीच आहेत. दोन वर्षांत दहशतवादी हल्ल्यात २३० जणांचा मृत्यू झाला आहे. असं असताना, गुरुवारी पुन्हा फ्रान्सची राजधानी हादरली. सेंट्रल पॅरिसमध्ये एका दहशतवाद्यानं मशीन गनने पोलिसांच्या गाडीवर गोळीबार केला. त्याला पोलिसांनी ठार केलं, तर दुसरा दहशतवादी पसार झाला आहे. त्याची ओळख पटली असून, त्याला कुणी मदत केली याचा तपास पोलीस करत आहेत.