कोकण रेल्वेवरील स्टेशन्स अद्यायावत करण्याच्या टप्प्याला सुरुवात झाली असून शनिवारी सावंतवाडी टर्मिनसचे भूमीपूजन मुख्यमंत्री देवेंद्र फडणवीस यांच्या हस्ते झाले. राज्य सरकार रेल्वे प्रकल्पासाठी दहा हजार कोटी रुपये गुंतवणार असून रेल्वेच्या सक्षमीकरणासाठी केंद्राबरोबर राज्य सरकारही प्रयत्नशील राहील, अशी ग्वाही फडणवीस यांनी यावेळी दिली.
आघाडी सरकारकडून न झालेली कामे युती सरकार पूर्ण करेल आणि कोकणला विकासात सर्वात पुढे घेऊन जाईल, असे ते म्हणाले. सी वर्ल्ड, चीपी विमानतळ आदी कामे अग्रक्रमाने पूर्ण करण्यात येतील. बचतगटांना विशेष प्रोत्साहन देऊन कोकणच्या उत्पादनाला बाजारपेठ मिळवून देऊ, असेही मुख्यमंत्री म्हणाले. कोकणची सर्व रेल्वे स्टेशन्स अद्ययावत करण्यात येतील. रेल्वेसाठी साडेआठ कोटींची गुंतवणूक करण्यात येईल. तसेच पश्चिम महराष्ट्र कोकण रेल्वेला जोडला जाणार आहे, अशी माहिती रेल्वेमंत्री सुरेश प्रभू यांनी दिली. तसेच महत्त्वाची बंदरे रेल्वेशी संलग्न करण्यात येतील.
स्वच्छतेसाठीही निधी
स्वच्छ महाराष्ट्र अभियान यशस्वी करण्यासाठी चौदाव्या वित्त आयोगाचा निधी आणि राज्य सरकारच्या अनुदानाच्या सर्व योजना सप्तपदी स्वच्छेतेशी जोडण्याची घोषणा फडणवीस यांनी शनिवारी नाशिकमध्ये केली. ‘यापुढे स्वच्छतेसंदर्भात जो चांगले काम करेल, त्यालाच सरकारचे अधिक अनुदान मिळेल. खासदारांप्रमाणेच आमदारांनाही आता स्वच्छतेसाठी निधी देता यावा, यासाठी नियोजन आयोगाशी चर्चा करणार आहे.’ असेही मुख्यमंत्र्यांनी सांगतिले.