मुंबईसह राज्यातील महापालिका आणि जिल्हा परिषदेतील सत्ता काबीज करण्यासाठी भाजपने शिवसेनेसोबत युती करण्याचा निर्णय घेतला आहे. २५ जिल्हा परिषदांपैकी पाच ठिकाणी सेना व भाजपची स्वबळावर सत्ता येईल. तसेच युती झाल्यामुळे आणखी आठ जिल्हा परिषदेत ते सत्ता काबीज करतील.
मुंबई महापालिकेत भाजपने शिवसेनेला सत्तेसाठी पाठिंबा दिला आहे. ठाण्यात शिवसेनेची स्वबळावर सत्ता आली आहे, तर पुण्यासह आठ महापालिकेत भाजपने सत्ता मिळविली आहे. पालिकेप्रमाणे जिल्हा परिषदेच्या निवडणुका भाजप व शिवसेनेने स्वबळावर लढविल्या होत्या. त्यापैकी रत्नागिरी जिल्हा परिषदेत शिवसेनेची स्वबळावर सत्ता आली आहे, तर भाजपने जळगाव, लातूर, वर्धा आणि चंद्रपूर जिल्हा परिषदेत भाजपनेही स्वबळावर सत्ता मिळविली आहे. मुख्यमंत्री देवेंद्र फडणवीस यांच्या अध्यक्षतेखाली भाजपच्या कोअर समितीची बैठक झाली. यात उर्वरित आठ जिल्हा परिषदांमध्ये सेनेसोबत युतीचा निर्णय झाला.