भुसावळ : येथील पं. स. समितीमधील गृहनिर्माण अभियंता भाग्यश्री शिंदे यांना लाच घेताना बुधवारी जळगावमधील अँटीकरप्शन ब्युरोने रंगेहाथ पकडले.
तक्रारदार कंडारी येथील महिलेच्या पतीचे नावे इंदिरा आवास योजनेत घर मंजूर झाले आहे. यात सरकार तीन टप्प्यांत अनुदान देते. दोन हप्ते मिळाले असून, तिसऱ्या टप्प्याचे अनुदान घेण्यासाठी ती महिला गेली होती. यावेळी भाग्यश्री शिंदे यांनी दोन हजार रुपये लाच मागितली. तक्रारदाराने जळगाव येथे याची तक्रार लाचलुचपत प्रतिबंधक विभागाकडे केली. या तक्रारीवर बुधवारी, लाचलुचपत प्रतिबंधक विभागाने सापळा रचला. या सापळ्यात भाग्यश्री शिंदे यांना तडजोड अंती एक हजार रुपयांची लाच घेताना रंगेहाथ पकडण्यात आले. याबाबत भुसावळ शहर पोलिस ठाण्यात तक्रार दाखल करण्यात आली आहे.