अंगणवाडीतल्या मुलांसाठी चिक्की, लाडू, सतरंजा आदी साहित्य निविदा काढून कंत्राटदारांकडून खरेदी करण्यात येते. महिला व बालविकासमंत्री पंकजा मुंडे यांनी, केवळ दोन दिवसांत अंगणवाडीसाठी लागणाऱ्या साहित्यांची २०६ कोटी रुपयांच्या खरेदीचे सरकारी सोपस्कार पार पाडले. तसेच, या खरेदीबाबत दोन दिवसांत २४ शासन निर्णय काढण्यात आले. या कंत्राटात गैरव्यवहार झाला असल्याची तक्रार प्रदेश काँग्रेसचे प्रवक्ते सचिन सावंत यांनी लाचलुचपत प्रतिबंधक विभागाचे प्रमुख प्रवीण दीक्षित यांच्याकडे केली होती. या तक्रारीची दखल घेऊन लाचलुचपत प्रतिबंधक विभागाने राज्याचे महिला व बालकल्याण विभागाच्या प्रधान सचिवांना स्पष्टीकरण देण्याचे आदेश दिले आहेत.
अंगणवाडी साहित्य खरेदी गैरव्यवहाराबाबत काँग्रेसबरोबर विधान परिषदेचे विरोधी पक्षनेते धनजंय मुंडे यांनीही मुख्यमंत्र्यांकडे तक्रार केली होती. त्यांनीही या प्रकरणाची सखोल चौकशी व्हावी, अशी मागणी केली आहे.
पंकजाविरोधात आंदोलन
महिला व बाल विकासमंत्री पंकजा मुंडे यांच्यावरील कथित भ्रष्टाचाराच्या आरोपावरून, त्यांच्या विरोधात राष्ट्रवादी युवक काँग्रेसतर्फे शनिवारी २७ जूनपासून राज्यव्यापी रास्तारोको आंदोलन केले जाणार आहे, अशी माहिती राष्ट्रवादी युवक काँग्रेसचे प्रदेशाध्यक्ष उमेश पाटील यांनी दिली आहे. हे आंदोलन राज्याच्या प्रमुख शहरात व प्रत्येक जिल्ह्याच्या ठिकाणी केले जाणार असून मुंडे जोपर्यंत आपल्या मंत्रिपदाचा राजीनामा देत नाहीत, तोपर्यंत हे आंदोलन सुरू राहील, असा इशारा पाटील यांनी दिला आहे.
..
भाजपच्या तीन मंत्र्यांच्या भ्रष्टाचाराचे स्टिंग ऑपरेशन माझ्याकडे आहे. विधिमंडळाच्या येत्या अधिवेशनात ते मी उघड करीन.
– राधाकृष्ण विखे पाटील, विधानसभेतील विरोधीपक्षनेते